Komisioneri i Mbrojtjes i BE-së bën thirrje për “më shumë integrim me industrinë mbrojtëse të Ukrainës”

Një Task Forcë BE-Ukrainë për të forcuar lidhjet e industrive të mbrojtjes do të takohet për herë të parë të hënën.

“Sot, ne njoftojmë krijimin e Task Forcës ndërinstitucionale BE-Ukrainë. Dhe sot ekspertët ukrainas dhe evropianë të këtij grupi do të mblidhen për takimin e parë për të ndihmuar integrimin e industrive tona të mbrojtjes, për të lehtësuar zhvillimin e projekteve të përbashkëta ose proceseve të përbashkëta të prokurimit”, ka thënë Andrius Kubilius, komisioneri evropian për mbrojtjen dhe hapësirën, në edicionin e dytë të Forumit të Industrisë së Mbrojtjes BE-Ukrainë.

Çështjet e zinxhirit të furnizimit dhe fushat e aftësive të identifikuara si prioritete, duke përfshirë eksplozivët dhe dronët, janë me interes të veçantë për grupin, shkruajnë mediat e huaja.

“Ne duhet të mësojmë nga Ukraina se si të krijojmë një infrastrukturë prodhimi dhe operimi të dronëve”, tha Kubilius, duke shtuar se kur bëhet fjalë për dronët “kush ka më shumë nevojë për integrim: Ukraina apo Evropa? Përgjigja ime – Evropa”.

Sipas qeverisë ukrainase, kapaciteti vjetor i prodhimit të mbrojtjes së vendit pritet të arrijë në 35 miliardë euro këtë vit, një rritje 35-fish nga viti 2022 kur Rusia nisi sulmin e saj të paprovokuar në shkallë të plotë kundër fqinjit të saj.

Ndërkohë, industria e Evropës fillimisht pati vështirësi për t’u rritur, duke dështuar në objektivin për të prodhuar një milion fishekë brenda 12 muajve.

Tani është në rrugën e duhur për të prodhuar dy milionë fishekë këtë vit.

Kompanitë e mbrojtjes të Ukrainës nuk janë vetëm të testuara në betejë, por edhe “të shpejta”, “moderne” dhe të afta të prodhojnë me “gjysmën e çmimit” krahasuar me homologët e tyre evropianë, tha Kubilius.

“Ekziston nevoja që evropianët jo vetëm të blejnë armë nga Ukraina dhe për Ukrainën. Ekziston një nevojë e qartë që evropianët të përfitojnë në teknologji, njohuri të prodhimit dhe sisteme menaxhimi nga Ukraina për industritë tona evropiane të mbrojtjes”, theksoi ai gjithashtu.

Ndërsa Alexander Kamyshin, një këshilltar i presidentit ukrainas Volodymyr Zelensky, i tha të njëjtit forum se konflikti do të hyjë në histori “si lufta e parë botërore me dronë”.

Ukraina, shtoi ai, ka pasur “sukses të konsiderueshëm në prodhimin e të gjitha llojeve të sistemeve pa pilot” dhe tani ka “një zgjidhje për shënjestrimin automatik të drejtuar nga inteligjenca artificiale për dronë sulmues ajror”.

“Ne jemi të gatshëm të ndajmë atë që industria jonë mësoi në këtë luftë me ju, partnerët tanë strategjikë”, tha ai, duke shtuar: “Ne jemi këtu për të ndërtuar së bashku arsenalin e botës së lirë”.

BE-ja planifikon të derdhë qindra miliarda euro në sektorin e mbrojtjes gjatë katër viteve të ardhshme, duke përfshirë deri në 650 miliardë euro përmes hapësirës fiskale shtesë dhe 150 miliardë euro përmes një programi të ri kredie, të quajtur SAFE, që synon rritjen e prokurimit të përbashkët të aftësive të prodhuara në Evropë, dhe nga i cili Ukraina dhe kompanitë e saj mund të përfitojnë gjithashtu.