Cilat dezinformime po përhapen shumë për Papa Leo XIV?

Ashtu siç ishte edhe paraardhësi i tij shënjestër kryesore e lajmeve të rreme, edhe Papa Leo XIV është bërë viktimë e pretendimeve të ndryshme të pavërteta në rrjetet sociale dhe më gjerë.

Vetëm një javë pas fillimit të pontifikatit të tij, Papa Leo XIV tashmë është gjendur në qendër të një sërë narrativash të rreme, ashtu siç kishte ndodhur më parë me Papa Françeskun, shkruan euronews.

Shembull, një mesazh në rrjetet sociale pretendon se një video tregon Papën e ri duke injoruar me qëllim dhe duke u larguar nga një flamur LGBTQ+ me ngjyrat e ylberit, ndërsa përshëndet të pranishmit në Vatikan.

Megjithatë, flamuri në video nuk është flamuri LGBTQ+ – është flamuri italian i paqes, i përdorur për herë të parë në vitin 1961, që i paraprin flamurit LGBTQ+, transmeton Telegrafi.

Në flamur, megjithëse mbishkrimi është i kthyer mbrapsht, shkruhet qartë “Pace”, fjala italiane për “Paqe”, dhe nuk ka asnjë tregues se Papa Leo është larguar qëllimisht prej tij gjatë përshëndetjes.

Videoja origjinale është e disponueshme në kanalin zyrtar të YouTube të Vatikanit, dhe thuhet se ngjarja ka ndodhur gjatë një audiencë ndërmjet ipeshkvit të Romës dhe profesionistëve të medias më 12 maj.

Një tjetër thashetheme në internet sugjeron se Papa, në një moment të papërcaktuar gjatë një lutjeje, u ka bërë thirrje njerëzve që të jenë “woke”.

“Woke” nënkupton të jesh i zgjuar ndaj vuajtjes së të tjerëve, i udhëhequr nga e vërteta, dhe i përulur përpara mëshirës. Pretendohet se Papa Leo ka thënë se “Jini të zgjuar, jini plot dashuri, jini woke”.

Megjithatë, nuk ka asnjë provë që ai t’i ketë thënë ndonjëherë këto fjalë. Një kërkim në Google nuk sjell asnjë lajm të rëndësishëm apo deklaratë zyrtare nga Vatikani, dhe kontrollues të tjerë faktesh kanë raportuar se autori i fotos ku bazohet kjo deklaratë ka pranuar se gjithçka ishte e trilluar.

Kanë qarkulluar gjithashtu spekulime se Papa Leo do t’u kushtojë vëmendje temave LGBTQ+ dhe çështjeve të tjera që perceptohen si “woke”, pas vlerësimeve që mori Papa i ndjerë Françesku për qëndrimin e tij më të butë ndaj komunitetit LGBTQ+ në krahasim me paraardhësit, për mbështetjen ndaj migrantëve dhe të varfërve, si dhe për komentet mbi krizën klimatike.

Shumë shpresojnë që Papa i ri do ta vazhdojë lëvizjen e Kishës Katolike drejt një qëndrimi më liberal sa i përket çështjeve shoqërore, duke ndjekur atë që shumë e konsiderojnë si trashëgiminë më progresive të Papa Françeskut.

Një pretendim më serioz pohon se Papa Leo ka fshehur një sërë rastesh të abuzimit seksual të kryera në vitin 2004 nga një prift peruan, dhe se në vitin 2022, kur ishte ipeshkëv i Chiclayo, ka mësuar për to, por nuk i ka hetuar.

Kardinali Robert Prevost, siç quhej atëherë Papa Leo, është akuzuar gjithashtu për fshehjen e një tjetër rasti abuzimi seksual nga një prift në Chicago. Megjithatë, Vatikani i mohon me vendosmëri këto pretendime.

Gazeta spanjolle El País raporton se Dikasteri për Doktrinën e Fesë i Selisë së Shenjtë, organi përgjegjës për disiplinën fetare në Kishën Katolike, e ka hetuar plotësisht çështjen dhe ka arritur në përfundimin se sjellja e Papa Leos ka qenë “e patëmetë”.

Po ashtu thuhet se burime pranë çështjes kanë theksuar se është e dyshimtë që akuzat dëmtuese dolën pikërisht në prag të konklavës në të cilën Prevost u zgjodh Papa Leo.

Pedro Salinas, gazetar peruan që ka hulumtuar në detaje akuzat për abuzim seksual në Kishën Katolike, gjithashtu ka arritur në përfundimin se akuzat ndaj papës së ri janë të pabazuara.

“Nuk ekziston asnjë provë e dokumentuar dhe as dëshmi e besueshme që ta lidhin Papa Leon me këto raste,” ka deklaruar ai