Portieri Muslera përshëndetet nga Galatasaray me gol dhe me titull kampioni

Portieri i Galatasarayt, Fernando Muslera shënoi gol nga penalltia për ta ndihmuar ekipin e tij në fitoren vendimtare 3:0 ndaj Kayserispor mbrëmë, e cila ia siguroi titullin e kampionit në Superligën turke ekipit nga Stambolli.

Muslera e bëri një veprim të rrallë duke shkuar në zonën kundërshtare në minutën e 89-të.

Atij iu dha penalltia për ta gjuajtur në festën e ekipit vendës derisa rezultati ishte 2:0.

Ky rezultat e ngriti Galatasarayn në kuotën e 89 pikëve pas 34 ndeshjesh, të mjaftueshme për ta mbajtur distancën prej 8 pikësh ndaj Fenerbahçes së Jose Mourinhos, dy ndeshje pa përfunduar sezoni.

Ky në fakt nuk ishte goli i parë i Musleras me ekipin turk.

Ai kishte shënuar nga penalltia edhe në vitin 2012 kundër Manisasporit në ndeshjen e fundit të sezonit të tij debutues me klubin turk.

Dhe, penalltia e mbrëmshme ishte edhe një lloj përshëndetjeje e Musleras me tifozët pasi në fund të këtij sezoni, kur edhe do t’i skadojë kontrata, pas 14 vjetësh qëndrimi, ai do të largohet nga Galatasaray.