Aktakuza e Prokurorisë ndaj zyrtarëve komunalë të Prizrenit, për skandalin “mbi 550 mijë euro”, reagon VETËVENDOSJE!

Lëvizja VETËVENDOSJE! në Prizren ka reaguar duke mirëpritur aktakuzën nga Prokuroria ndaj zyrtarëve komunal të Prizrenit, ku flitet për një skandal, që kap vlerën mbi 550 mijë euro, e që i ka shkaktuar dëm financiar mbi 412 mijë euro në buxhetin e Komunës.

VV e vlerëson këtë dëshmi të qartë të kapjes së institucioneve në nivel lokal, nga qeverisja e Shaqir Totajt, “që e kanë shndërruar Komunën e Prizrenit në vend të favoreve klienteliste, korrupsionit institucional dhe shpërdorimit të parasë publike”.

Komunikata e plotë:

Lëvizja VETËVENDOSJE! Qendra në Prizren e mirëpret ngritjen e aktakuzës nga Prokuroria Themelore në Prizren, Departamenti për Krime të Rënda, ndaj zyrtarëve komunalë dhe përfaqësuesit të kompanisë private për veprat penale të keqpërdorimit të pozitës zyrtare dhe mashtrimit në prokurim publik, në një skandal që kap vlerën mbi 550 mijë euro, e që ka shkaktuar dëm financiar mbi 412 mijë euro në buxhetin e Komunës së Prizrenit.

Sipas aktakuzës, zyrtarë të Komunës, në bashkëpunim me kompani private, kanë favorizuar në mënyrë të paligjshme një grup operatorësh ekonomikë në një tender publik për “Renovim dhe mirëmbajtje të objekteve të Komunës”, duke shpërfillur pesë oferta të tjera me çmime më të ulëta. Për më tepër, kontrata është menaxhuar në mënyrë të papërgjegjshme dhe në kundërshtim me ligjin për prokurim publik, duke përfunduar me realizimin vetëm të një pjese të punëve të parapara dhe duke krijuar një dëm të drejtpërdrejtë ndaj financave publike të qytetarëve të Prizrenit.

Ky rast është dëshmi e qartë e kapjes së institucioneve në nivel lokal, nga Partia Demokratike e Kosovës dhe kryetarit Shaqir Totaj, të cilët e kanë shndërruar Komunën e Prizrenit në vend të favoreve klienteliste, korrupsionit institucional dhe shpërdorimit të parasë publike.

 
Ne ritheksojmë se qeverisja e PDK dhe kryetarit Shaqir Totaj, është shndërruar në simbol të keqpërdorimit e zhvatjes së parasë publike në Komunën e Prizrenit. Qytetarët e Prizrenit nuk e meritojnë një pushtet të zhytur në afera korruptive!

Lëvizja VETËVENDOSJE! Qendra në Prizren beson se qytetarët e Prizrenit e meritojnë një qeverisje të ndershme, transparente dhe në shërbim të tyre!
Lëvizja VETËVENDOSJE! – Qendra në Prizren!