Po lëvizte me një artefakt antik me skuter, arrestohet turisti gjerman në Romë

Një turist gjerman është arrestuar të mërkurën në Romë, pasi u kap duke lëvizur me një skuter elektrik të marrë me qira, mbi të cilin kishte vendosur një objekt mermeri të lashtë, bazamentin e një kolone romake.

Ngjarja ndodhi në rrugën elegante Via Vittorio Veneto, pranë parkut Villa Borghese, në qendër të kryeqytetit italian.

Oficerët e karabinierisë e ndaluan 24-vjeçarin gjerman pasi vunë re objektin e pazakontë prej rreth 30 kilogramësh të vendosur në këmbët e skuterit.

Sipas deklaratës zyrtare, turisti e quajti objektin “një suvenir”, por autoritetet italiane e cilësuan menjëherë si një pasuri kulturore me vlerë historike dhe artistike.

Pasi u sekuestrua, mermeri u dërgua për ekzaminim të mëtejshëm nga Superintendenca Speciale për Arkeologji, Arte të Bukura dhe Peizazh e Romës, e cila e konfirmoi se bëhej fjalë për një artefakt autentik që mund të ketë origjinën nga një prej zonave arkeologjike të qytetit.

Turisti është kallëzuar në zyrën e prokurorisë publike dhe po përballet me akuza për posedim të mallrave të vjedhura me rëndësi kulturore.

Ndërkohë, mbetet e paqartë se si ai ka arritur ta marrë objektin dhe nga cili vend i saktë arkeologjik e ka marrë.