Gazlotsjellës, tifozë të lënduar në Mynih para finales së Championsit

Festimet për finalen e shumëpritur të Champions League midis Paris Saint-Germain dhe Inter, e cila do të luhet sonte në Allianz Arena në orën 21:00, janë errësuar nga përplasje të dhunshme dhe tensione të forta në rrugët e Mynihut.

Policia gjermane ka ngritur nivelin e alarmit pasi situata është përshkallëzuar në disa pjesë të qytetit, vetëm pak orë para nisjes së ndeshjes.

Incident në metro: gaz lotsjellës dhe panik

Një nga episodet më serioze u shënua në linjën U6 të metrosë, në stacionin “Universität”, ku është raportuar përdorimi i gazit lotsjellës brenda njërit prej trenave. Incidenti çoi në aktivizimin e frenës emergjente, duke shkaktuar ndërprerje dhe kaos në lëvizjen e pasagjerëve. Stafi i metrosë nuk arriti të ndërhynte për shkak të situatës së tensionuar.

Tifozë të lënduar pranë stadiumit

Tensione të tjera u regjistruan në stacionin Fröttmaning, pranë stadiumit ku do të luhet finalja. Disa tifozë të Interit kanë mbetur të lënduar, madje disa raportime flasin për tifozë të gjakosur pas përplasjeve fizike. Për fat, një gardh sigurie mes shinave ndaloi që dhuna të përhapet më tej.

Gurë dhe përleshje mes tifozëve

Përplasjet kanë vazhduar edhe në pika të tjera të qytetit.

Në stacionin Fröttmaning, tifozët e Interit raportohet se kanë hedhur gurë në drejtim të tifozëve të PSG-së.

Përleshje fizike janë regjistruar edhe në stacionin qendror të trenit, ku policia ndërhyri me shpejtësi për të shmangur përshkallëzimin e dhunës.