Ter Stegen siguron të ardhmen e tij te Barcelona: Qëndroj këtu

Mark Andre ter Shtegen nuk ka dyshime, ai do të jetë ende portieri i Barcelonës sezonin e ardhshëm.Në një konferencë për shtyp nga kampi stërvitor i ekipit kombëtar gjerman, ku po përgatiten për gjysmëfinalen e Ligës së Kombeve kundër Portugalisë, ai sqaroi çdo dyshim: “Askush në klub nuk më ka thënë se duan të më shesin. Nuk jam i shqetësuar, e ardhmja ime është te Barça”.

Thashethemet për mbërritjen e afërt të Joan Garsias nga Espanjol nuk e trembin atë. Në fakt, Ter Stegen rilançon: “Gjithmonë ka pasur konkurrencë, në çdo rol. Kushdo që vjen duhet ta meritojë vendin e tij. Dua të vazhdoj të jap më të mirën time”.

Pas tetë muajsh jashtë për shkak të një dëmtimi në gju, gjermani është rikthyer në formë dhe pret sezonin e ardhshëm me entuziazëm: “Fizikisht jam më mirë se më parë, kam punuar shumë dhe kam arritur në limit. Tani dua të fitoj përsëri.”

Portieri 32-vjeçar, me kontratë deri në vitin 2028, nënvizoi vlerën e klubit: “Barcelona është një nga më të mëdhatë në botë, është normale që ata gjithmonë përpiqen të përmirësohen. Por unë jam gati të luftoj për vendin tim”.

Ndërkohë, ai falënderon trajnerin gjerman Julian Nagelsman për besimin e tij pas daljes në pension të Nojerit: “Të jesh titullar në ekipin kombëtar është një nder, do të jap gjithçka për të arritur në Kupën e Botës 2026 në formën time më të mirë.” Kristiano Ronaldo e pret të mërkurën me Portugalinë:

“Një kampion i madh, por shpresoj që shifrat e tij të mos përmirësohen kundër nesh”.