Bullgaria do të rrisë shpenzimet për mbrojtje

Bullgaria do të rrisë shpenzimet për mbrojtje në 3.5% të Prodhimit të Brendshëm Bruto (PBB) deri në vitin 2032, deklaroi Ministri i Mbrojtjes, Atanas Zapryanov, të martën gjatë një forumi të përqendruar në mundësitë për thellimin e bashkëpunimit në fushën e mbrojtjes mes Bullgarisë dhe Gjermanisë, si dhe në trendet aktuale në industrinë e mbrojtjes.

“Për të siguruar suksesin e projekteve tona investuese në fushën e mbrojtjes, shpenzimet tona arritën në 2% të PBB-së në vitin 2024. Megjithatë, kjo tashmë nuk është e mjaftueshme dhe kemi vendosur të rrisim shpenzimet për mbrojtje në të paktën 2.5–3%, me një synim për të arritur 3.5% të PBB-së deri në vitin 2032, si nivel minimal për të pasur sukses në përpjekjet tona për modernizim”, tha Zapryanov.

“Rusia është kërcënimi më serioz dhe i drejtpërdrejtë për sigurinë euroatlantike. Duhet të jemi të përgatitur për t’u përballur me një paqëndrueshmëri afatgjatë. Kjo është veçanërisht e rëndësishme për sigurinë tonë rajonale në Detin e Zi dhe në Evropën Juglindore. Për t’u përballur me rreziqet dhe kërcënimet e sotme dhe të së nesërmes, ne jemi të përqendruar në forcimin e mbrojtjes sonë kombëtare brenda kuadrit të planifikimit kolektiv të NATO-s dhe politikës së përbashkët të sigurisë dhe mbrojtjes të BE-së. Për të ndërtuar dhe përmirësuar kapacitetet mbrojtëse të Bullgarisë, Ministria e Mbrojtjes po kërkon në mënyrë aktive bashkëpunim me industrinë bullgare të mbrojtjes dhe është e gatshme ta mbështesë atë", shtoi Zapryanovm,  shkruan kosovapress.

Bullgaria do të synojë të përdorë mekanizmat e BE-së për të krijuar më shumë fleksibilitet fiskal për shpenzimet e mbrojtjes, duke ruajtur një politikë fiskale konservatore në funksion të anëtarësimit të saj të pritshëm në eurozonë, tha Zapryanov të hënën gjatë samitit të B9 (Bucharest Nine) të krerëve të shteteve dhe qeverive në Vilnius, Lituani.