Prizren: Dënohet nga gjykata Beqir Hoxha i njohur si “Beqa”
- Gazeta e Prizrenit
Gjykata në Prizren e ka dënuar me 4 vite e 5 mijë euro gjobë Beqir Hoxhen i njohur si “Beqa” i cili ishte i akuzuar për veprën penale “fajde”, njoftoi Insajderi.
Më 6 nëntor të vitit 2023, ishte ngritur aktakuzë ndaj Beqir Hoxhës, duke e akuzuar se ka marrë shumën prej 78 mijë euro nga të dëmtuarit, në emër të fajdesë.
“Fajde me kamatë deri në 200 euro dita. Kërcënim përmes telefonit me fjalët “kena me u vra”. 6 mijë euro borxh që u bënë në fund 78 mijë euro me fajde”. Janë këto vetëm disa nga gjërat e përmendura në aktakuzën kundër Beqir Hoxhës- “Beqës”.
Ai akuzohet se duke shfrytëzuar gjendjen e rëndë financiare të dëmtuarve, kontrakton shuma dukshëm jo proporcionale të pasurisë në këmbim të shërbimit (dhënies së borxhit), ku me rastin e dhënies së të hollave, 600 euro i ndal në emër të kamatës mujore dhe e paralajmëron se për çdo vonesë duhet të paguajë nga 600 euro kamata mujore.
Aktakuza thotë që në emër të kamatës, viktima F.S., nga muaji qershor i vitit 2016 deri në muajin prill 2023 ka paguar shumën prej 49 mijë e 200 euro.
Sipas dosjes, i njëjti më 18 shkurt 2018 duke mos arritur t’i paguajë shumat e kamatave, nga i akuzuari Hoxha merr 3 mijë euro, ndërsa në muajin mars merr shumën e të hollave prej 2,000 euro, për të cilat paralajmërohet nga Hoxha se për çdo vonesë duhet të paguajë nga 500 euro kamata mujore.
Për këtë, i dëmtuari nga muaji mars 2018 deri në muajin janar 2023, në emër të shumës së marrë prej 5 mijë euro vazhdon të paguajë nga 500 euro kamata mujore, duke i dhënë ‘Beqës’ shumën prej 29 mijë euro.
Në total, i dëmtuari paguan në emër të kamatave shumën prej 78 mijë e 200 euro dhe kur nuk arrin t’i paguajë, Hoxha e paralajmëron se duhet të paguajë sërish nga 200 euro kamata ditore, me ç’rast nga i dëmtuari më datë 22 gusht 2023, i merr 12 mijë e 800 euro dhe u arrestua në flagrancë.
