Kimmich, 100 ndeshje me Gjermaninë

Mbrëmja e sotme do të jetë veçanërisht e veçantë për Joshua Kimmich.

Përveç gjysmëfinales kundër Portugalisë në Nations League, mesfushori i Bayern Munich do të shënojë një moment historik në karrierën e tij: ndeshjen e 100-të me kombëtaren e Gjermanisë, një arritje që e bën krenar.

Kimmich, 30 vjeç, debutoi për "Die Mannschaft" më 29 maj 2016 në një miqësore nën drejtimin e Joachim Löw, kur ishte vetëm 21 vjeç.

Tashmë, kapiten dhe një nga figurat qendrore të ekipit, ai ka shënuar 8 gola dhe ka qenë një nga lojtarët më të qëndrueshëm të dekadës së fundit.

“Është një nder i madh të luash kaq shumë ndeshje për Gjermaninë. Tregon që në 9-10 vitet e fundit kam luajtur në një nivel të mirë.

Nuk kam pasur shumë dëmtime. Shpresoj të shtohen edhe disa ndeshje të tjera. Kjo është diçka për të cilën mund të jesh shumë, shumë krenar.

Duhet të jetë diçka e veçantë për çdo lojtar të veshë fanellën e Gjermanisë, qoftë për herën e dhjetë, të njëqindtë apo të njëqindepesëdhjetën,” u shpreh Kimmich për kanalet zyrtare të Federatës Gjermane të Futbollit.

Trajneri aktual, Julian Nagelsmann, vlerësoi ndikimin e tij në skuadër: "Joshua është një shembull i jashtëzakonshëm se sa e rëndësishme është emocionet të shoqërohen me cilësinë.

Ai ka një peshë të madhe në ekip, është i zgjuar dhe një futbollist i shkëlqyer.”

Nëse vazhdon me këtë ritëm, pas vetëm 5 ndeshjesh të tjera, Kimmich do të arrijë një tjetër figurë legjendare: Fritz Walter, kapiten i Gjermanisë kampione bote në vitin 1954.

Ai tashmë ka lënë pas emra të mëdhenj si Berti Vogts dhe Oliver Bierhoff, dhe është kthyer në një shtyllë të vërtetë për kombëtaren.

Ndeshja e sotme ndaj Portugalisë mund të jetë edhe një tjetër kapitull i rëndësishëm për një nga lojtarët më të kompletuar të brezit të tij.