Liria në 49 vjetorin e lindjes kujton dëshmorin e ish-lojtarin Përparim Thaçin

Sot në datëlindjen e tij, Liria,  kujton Përparim Thaçin – djaloshin që me krenari veshi fanellën bardh e zi të Lirisë. Në fushë ishte lojtar i talentuar e i përkushtuar, por mbi të gjitha mbetet i paharruar si njeri me shpirt të madh.

“Sot kujtojmë Përparim Thaçin – djaloshin nga Landovica, që më 30 gusht 1976 erdhi në jetë dhe me krenari veshi fanellën bardh e zi të Lirisë. Në fushë ishte lojtar i talentuar, i përkushtuar, por mbi të gjitha ishte njeri me shpirt të madh. Kur erdhën vitet e rënda, kur Kosova kishte nevojë për bijtë e saj, Përparimi nuk hezitoi. Ai la topin, la fushën, dhe mori pushkën në dorë. Nga lojtar i Lirisë u shndërrua në luftëtar të lirisë”, thuhet në njoftim.

Më 27 maj 1998, në moshën vetëm 21-vjeçare, Përparimi ra dëshmor. Por me rënien e tij nuk u shua as ëndrra, as kujtimi i tij. Përkundrazi, ai u bë pjesë e pavdekshme e historisë sonë, shembull i guximit dhe sakrificës së brezit që e solli Kosovën e lirë.

“Sot, çdo herë që përmendet emri i tij, çdo herë që hapim dyert e stadiumit që mban emrin “Përparim Thaçi”, ne e dimë se ai jeton mes nesh. Ai mbetet frymëzim dhe kujtim i gjallë për të gjithë ne, për çdo gjeneratë që vjen pas.

Lavdi përjetë Përparim Thaçit!
Lavdi të gjithë dëshmorëve të kombit! 🇦🇱”

#Liria #Arpagjikt #Prizren