Manchester United bën gati ofertën për portierin “hero” të Argjentinës

Manchester United është vënë në kërkim të një portieri të ri dhe sipas raportimeve të fundit nga mediat britanike, Emiliano “Dibu” Martinez është objektivi kryesor i klubit anglez për merkaton e dimrit.

Portieri argjentinas, kampion bote me kombëtaren e tij në Katar 2022, ka kontratë me Aston Villa-n deri në qershor të vitit 2029, por kjo nuk ka penguar drejtuesit e “Djajve të Kuq” të studiojnë mundësinë e një transferimi të mundshëm.

Sipas zërave të fundit, trajneri i ri i Manchester United, Ruben Amorim, e vlerëson shumë 32-vjeçarin dhe e dëshiron menjëherë në skuadër, për të forcuar repartin e portës, i cili ka qenë një nga pikat e dobëta të ekipit në këtë fillim sezoni.

Martinez, i njohur për karizmën dhe personalitetin e tij në fushë, shihet si profili ideal për të sjellë stabilitet dhe përvojë në prapavijën e United-it.

Megjithatë, Aston Villa nuk ka ndërmend ta lëshojë lehtë një nga lojtarët e saj më të rëndësishëm, ndaj negociatat pritet të jenë të vështira.