Starmer rikonfirmon mbështetjen për Ukrainën në përvjetorin e katërt të pushtimit rus

Kryeministri britanik Keir Starmer premtoi sot se do të qëndrojë pranë popullit të Ukrainës, për aq kohë sa të duhet, ndërsa kritikoi ashpër presidentin rus, Vladimir Putin për bllokimin e rrugës drejt paqes.

Kryeministri përdori një fjalim para Kabinetit në përvjetorin e katërt të pushtimit të fqinjit të tij nga Putini për të lavdëruar “qëndresën e jashtëzakonshme” të Ukrainës.

“Bëhet fjalë për vlerat tona të lirisë, demokracisë dhe të drejtës së një vendi për të vendosur vetë se çfarë bën, që është demokracia dhe sovraniteti”, tha Starmer.

“Ndikimi i luftës, po ndihet në familjet në të gjithë Britaninë e Madhe, për shkak të rritjes së çmimit të energjisë që nga pushtimi”, tha ai.

“Ato janë 40% më të larta se sa ishin më parë. Çdo familje po e ndjen atë”, tha Starmer.

“Mënyra dhe koha kur do të përfundojë ky konflikt, do të ndikojë tek të gjithë, në Britaninë e Madhe – për një kohë shumë të gjatë, prandaj është kaq e rëndësishme të sigurohemi që të arrihet një paqe e drejtë dhe e qëndrueshme”, theksoi kryeministri britanik.

“Por, është Putini ai që po i pengon rezultatet”, shtoi Starmer.