Dy predha kanë goditur xhamin e dritares së një shtëpie në Prizren, ndërsa ngjarja është zbuluar pasi fëmijët e familjes kanë vërejtur dëmtimin. Rasti ka vënë në lëvizje Policinë dhe njësitë e kriminalistikës, të cilat kanë sekuestruar dy predha në vendin e ngjarjes, mëson Gazeta Sinjali.
Sipas burimeve të Sinjalit, bëhet fjalë për shtëpinë e V.K., rreth 43-vjeçar, në rrugën “Ylber Fanaj” në Prizren.
Ngjarja është regjistruar si incident i datës 14 nëntor, ndërsa Policia është njoftuar më 16 nëntor, rreth orës 11:30.
Kur patrulla ka mbërritur në vendin e ngjarjes, pronari i shtëpisë ka deklaruar se fëmijët e tij kishin vërejtur se xhami i dritares ishte goditur nga predhat.
Ende nuk dihet kush i ka shkrepur të shtënat dhe në çfarë rrethanash predhat kanë goditur shtëpinë.
Për rastin është njoftuar Prokurori i Shtetit, ndërsa hetimet janë iniciuar për veprën penale “Shkaktimi i rrezikut të përgjithshëm”.