Për tri ditë, policia identifikoi mbi 30 vetura të paregjistruara në rajonin e Prishtinës

Policia ka bërë të ditur se me veturën “Inteligjente”, në rajonin e Prishtinës ka filluar plani për identifikimin e  veturave të pa regjistruara të cilat qarkullojnë në rrugë si dhe veturat tjera që shkelin rregullat në trafik.

Në njoftimin e policisë thuhet se për tri ditë të veprimit, në këtë rajon janë identifikuar mbi 30 vetura të paregjistruara.

“Policia e Rajonit të Prishtinës respektivisht, Njësiti i  Trafikut të Kryeqytetit,  në kuadër të aktivitete të planifikuara për qëllim të sigurisë rrugore, me veturën “Inteligjente” kanë filluar planin për identifikimin e  veturave të pa regjistruara të cilat qarkullojnë në rrugë si dhe veturat tjera që shkelin rregullat në trafik”.

“Ky sistem kryen identifikimin automatik të menjëhershëm të veturave të paregjistruara edhe gjatë lëvizjes. Vetëm për tri ditë të veprimit,  janë identifikuar mbi 30 vetura të paregjistruara. Ndaj shoferëve janë shqiptuar fletëparaqitjet sipas ligjit si dhe veturat janë përjashtuar nga trafiku duke i konfiskuar përkohësisht targat e regjistrimit”, thuhet në njoftimin e policisë.