Barcelona është e hapur të negociojë

Barcelona thuhet se ka konfirmuar se nuk do të ketë ndryshime të mëdha në skuadër në afatin kalimtar të janarit, por mund të ketë nevojë për largime.

Si drejtori sportiv Deko ashtu edhe trajneri Hansi Flik e kanë bërë të qartë se është thelbësore të mbahen të gjithë lojtarët aktual, për shkak të kufizimeve të “Fair Play Financiar”, të cilat e pengojnë klubin të nënshkruajë ose regjistrojë lojtarë të rinj. Megjithatë, në verë priten ndryshime të mëdha.

Sipas gazetës “Sport”, Dekos i është thënë se Barcelonës do t’i duhet të shesë lojtarë për të mbledhur të paktën 80 milionë euro, dhe potencialisht më shumë. Barcelona ka një tepricë të qendërmbrojtësve dhe janë planifikuar ndryshime edhe në mesfushë.

Erik Garsia dhe Andreas Kristensen janë dy mbrojtësit që mund të shiten. Garsia mund të tërheqë oferta nga Premier Liga ndërsa Kristensen, me kontratë deri në vitin 2026, ka ende vlerën e tregut, pavarësisht se është i dëmtuar.

Në mesfushë, Pabllo Torre, i cili ka rënë në favor, dhe Frenki de Jong, paga e lartë e të cilit e bën atë një opsion të pasigurt, mund të largohen të dy. Në sulm, Ansu Fati nuk është në planet e ardhshme të Barcelonës, madje klubi është i gatshëm ta lirojë atë nga kontrata e tij për të kursyer në paga.