Kombëtarja shqiptare e vajzave nis vitin me grumbullim 10 ditor në Mal të Zi

- Bota Sot

Kombëtarja shqiptare e vajzave nis vitin me grumbullim 10 ditor në Mal të Zi

Kombëtarja shqiptare e vajzave do të zhvillojë grumbullimin e parë për vitin 2025 në Mal të Zi.

Ekipi kuqezi, nën drejtimin e trajnerit Armir Grima dhe stafit të tij, do të qëndrojë i grumbulluar për 10 ditë, nga data 17 deri më 25 janar, në qytetin e Ulqinit.

Gjatë kësaj periudhe, skuadra do të kryejë përgatitje intensive, ndërsa stafi teknik do të ketë mundësinë të analizojë gjendjen fizike dhe teknike të lojtareve të grumbulluara, si dhe të vlerësojë potencialin e tyre për sfidat e ardhshme.

Trajneri Grima do të shpallë së shpejti listën e futbollisteve të ftuara.

Ky grumbullim vjen si një fazë e rëndësishme përgatitore për vajzat kuqezi, të cilat do të nisin fushatën e tyre në edicionin e ri të Nations League në muajin shkurt. Ndeshja e parë do të zhvillohet më 21 shkurt, ku Shqipëria do të presë Ukrainën në shtëpi, ndërsa katër ditë më vonë do të luajë në transfertë kundër Çekisë.

Ky grumbullim dhe përgatitje intensive janë thelbësore për ekipin kuqezi, që synon rezultate pozitive në këtë kompeticion të rëndësishëm europian.



Lexoni të gjitha në Bota Sot