Bayern rrezikon

Për herë të tretë këtë sezon, Bayern Munich pësoi tre gola në një ndeshje, më e fundit dje, kur u mund 3-0 nga Feyenoord. Kjo shënoi edhe humbjen e dytë me tre gola këtë sezon të Champions League, që ndërlikon disi pozitat e skuadrës bavareze.

“Duhet të jem i sinqertë, Feyenoord e meritoi fitoren. Ata luftuan shumë dhe vrapuan më shumë se ne. Kjo humbje është përgjegjësi e të gjithë ekipit”, deklaroi pas mbërritjes në Gjermani trajneri i Bayern Munich, Vincent Kompany.

“Ne patëm shumë raste. Ndjeva se mund të kishim shënuar një, dy ose më shumë gola por nuk e bëmë dot këtë. Ndërsa Feyenoord i shfrytëzoi më mirë momentet që krijoi dhe shënoi”, shtoi trajneri.

“Individualisht dhe kolektivisht nuk ishte e mjaftueshme nga ana jonë për ta fituar këtë ndeshje, performanca nuk ishte mjaftueshëm e mirë. Ne kishim momentet tona ku mund të kishim shënuar por nuk i shfrytëzuam”, tha Kompany.

Në takimin e fundit të kësaj faze, Bayern do të presë në shtëpi Slovan Bratislava dhe i duhet fitorja për të ruajtur pozitat (vendi i 15-të) dhe vijuar rrugëtimin në fazën play off të Champions League.