Francë, përmbytje rekord në perëndim të vendit

Tre rajone në Francën Perëndimore mbeten në alarm të kuq nga përmbytjet e sotme dhe qyteti Redon, pothuajse i izoluar, po përgatitet për një kulm historik.

E rrethuar nga lumenj, këneta dhe një kanal, zona Redon në Ille-et-Vilaine, në kufi me Morbihan dhe Loire-Atlantique, e cila ka gati 10 000 banorë, është veçanërisht e prekur.

Kulmi i përmbytjes nuk është përcaktuar ende. “Nuk do të arrihet sot. Sigurisht nesër”, sipas informacioneve të fundit nga bashkia e Redonit.

”Solidaritet me njerëzit atje që po përballen me përmbytjet”, shkroi presidenti Emmanuel Macron në X.

“E di mobilizimin dhe gjendjen e krijuar. Faleminderit për punën e bërë me ekipet e tyre dhe shërbimet shtetërore, angazhimin e të cilëve e përshëndes”, shtoi ai.

”Gjendja e fatkeqësisë natyrore do të shpallet në ditët në vijim”, tha ministrja për Tranzicionin Ekologjik, Agnès Pannier-Runacher.

Në total, që nga e diela, më shumë se 1 000 persona janë evakuuar në rajonin e Ille-et-Vilaine.

Këto përmbytje, të cilat nuk shkaktuan viktima, patën pasoja të shumta edhe në bujqësi, me stalla të përmbytura dhe fidanë të humbur.