Donnarumma nuk e mohon një transferim te Interi

Kapiteni i Italisë, Gianluigi Donnarumma, ka pranuar se i kishte munguar stadiumi San Siro dhe nuk e përjashtoi mundësinë e një rikthimi në Serie A, mes spekulimeve për interesimin e Interit.

Kontrata e portierit të PSG-së skadon në vitin 2026, por bisedimet për një rinovim në Paris kanë qenë në zhvillim prej disa muajsh. Sipas burimeve të ndryshme në Itali, Interi po monitoron situatën e Donnarummës, pasi kampionët e Serie A dëshirojnë ta rikthejnë kapitenin e Azzurrëve në Milano.

Ndryshe nga paraqitjet e mëparshme, këtë herë Donnarumma nuk u fishkëllye nga tifozët e Milanit gjatë ndeshjes së Italisë në San Siro kundër Gjermanisë, gjë që e gëzoi atë.

“Jam i lumtur sepse kalova shumë vite këtu. Rikthimi në një stadium si ky është gjithmonë emocionues. Falënderoj ata që më pritën kaq mirë, ishte ndjesia që dëshiroja të përjetoja. Më preku shumë dhe jam vërtet i lumtur.”

Kur një gazetar e pyeti nëse do të dëshironte të kthehej përgjithmonë në Stadio Meazza, Donnarumma buzëqeshi dhe u përgjigj:
“Jam i lumtur për këtë interesim, por mbi të gjitha jam i gëzuar që u riktheva.

Këto situata do të zhvillohen vetë, por për momentin jam i kënaqur që jam këtu, sepse më mungonin Italia, San Siro dhe shokët e skuadrës. Jemi të zhgënjyer për rezultatin, por do të përpiqemi të bëjmë më mirë në ndeshjen e kthimit.”

Në janar, Donnarumma kishte deklaruar se dëshiron të vazhdojë kontratën me PSG, por nuk ka ende një marrëveshje përfundimtare.