Flick: Kanë një fluturim të gjatë

Trajneri i Barcelonës, Hansi Flick, ka konfirmuar se sulmuesi anësor Raphinha dhe mbrojtësi Ronald Araujo nuk do të jenë të gatshëm për ndeshjen e shtyrë të LaLiga kundër Osasuna të enjten.

Dyshja ka qenë e angazhuar me kombëtaret e tyre në kualifikueset e Kupës së Botës për Amerikën e Jugut dhe Flick ka thënë se është më mirë që ata të rikuperohen pas ndeshjeve dhe pas udhëtimit të gjatë drejt Spanjës.

Barcelona kishte apeluar vendimin për ta zhvilluar këtë ndeshje këtë javë, por pa sukses. Fillimisht, ajo ishte shtyrë më 8 mars pas vdekjes së një prej mjekëve të klubit katalanas.

"Ata nuk do të luajnë, nuk janë në skuadër. Kanë një fluturim të gjatë dhe nuk është mënyra më e mirë, pasi duhet të rikuperohen", ka thënë Flick në konferencën për shtyp të mërkurën.

Raphinha ka qenë titullar në humbjen 4-1 të Brazilit ndaj Argjentinës, ndërsa Araujo ka qëndruar në stol në barazimin pa gola të Uruguait ndaj Bolivisë.