Kupa e Italisë, për të shpëtuar sezonin

Pas humbjes ndaj Napolit, Milani i var shpresat te Kupa e Italisë për të bërë sezonin më pak të hidhur dhe për të siguruar një vend në Evropë.

Objektivi është të arrijë në finalen e Romës, por fillimisht duhet të kalojë Interin dy derbi të shumëpritur.

"Duhet të hyjmë fuqishëm në ndeshje dhe të fitojmë," tha trajneri portugez, Conceiçao, në konferencën për shtypin.

"Pas ndeshjes është gjithmonë e lehtë të flasësh, por para saj jam unë ai që zgjedh formacionin ideal. Deri tani, ata që kanë hyrë në lojë kanë dhënë rezultate pozitive.

A është kjo mundësia e fundit për të siguruar Evropën? Nuk duhet të mendojmë shumë për këtë, duhet vetëm të fitojmë.

Sigurisht, është rruga më e shkurtër për tu kualifikuar në Evropë, por kemi ende ndeshje për të fituar në kampionat."

Mungesat dhe dilemat e formacionit

I pyetur për mungesën e Lautaro Martinez-it tek Interi, Conceiçao u përgjigj: "Edhe ne kemi mungesa të rëndësishme si Loftus-Cheek.

Ata kanë një skuadër të thellë." Për mundësinë që Leao të jetë titullar, ai u përgjigj me shaka: "Nesër nuk e di as nëse do të jem gjallë, e lëre më të përgjigjem për këtë pyetje."

Si e përjetoni këtë derbi dhe sa e rëndësishme është ndeshja e parë?

Derbi është gjithmonë i rëndësishëm, për kontekstin dhe për të gjithë. Interi është një skuadër e fortë, e ndërtuar mirë, por ne duam të hyjmë fuqishëm në fushë dhe të fitojmë.

Mund të jetë kjo nata e Leao?

Ajo që mendoj për të e kam thënë pas Superkupës. E njoh që kur ishte fëmijë. Ai duhet të evoluojë më tej, diçka që ende nuk e ka bërë.

Është një nga lojtarët me talent më të madh në botë, por i duhet më shumë vazhdimësi për të shënuar 20 gola në sezon. Nuk më pyesni pse luan ose nuk luan, vendos unë në bazë të asaj që shoh çdo ditë.

Keni folur me Santiago Gimenez?

Është normale që një lojtar i ri të ketë nevojë për kohë për t’u përshtatur. Pas 4-5 golave të parë, pati një rënie. Kampionati italian është një nga më të mirët në botë, duhet t’i japim kohë.

A keni folur me Joao Felix dhe si e vlerësoni debatin me Walker?

E njëjta gjë si me Gimenez, përshtatja është e vështirë. Episodet mes lojtarëve janë normale, më pëlqejnë ata që flasin dhe diskutojnë, sepse është e rëndësishme.

A do ta shpëtonte Kupa e Italisë këtë sezon?

Sigurisht që do të ishte një kënaqësi të fitoja një trofe, por më parë duhet të kalojmë gjysmëfinalen dhe më pas finalen. Unë përqendrohem te përmirësimi i skuadrës dhe te puna e përditshme.

Nuk e di si do të ndihem në fund të sezonit, por për momentin nuk jam njeriu më i lumtur në botë për atë që kam përjetuar në këta tre muaj.

Problemet mbrojtëse të Milanit...

Për të pasur ekuilibër, duhet të jetë e gjithë skuadra e përfshirë, jo vetëm mbrojtja. Dua një ekip kompakt, por nëse nuk ushtrojmë presion intensiv përpara, bëhet e vështirë dhe jemi të cenueshëm.

A mund të bëjë ky derbi diferencën në një sezon zhgënjyes?

Mund ta shihni gotën gjysmë plot ose gjysmë bosh. Milani nuk ka fituar dy tituj në një sezon prej shumë vitesh. Në renditje nuk jemi aty ku duhet, por ky derbi mund të na çojë më afër finales.