Daku “tremb” Kombëtaren

Situata qenka shumë më serioze sesa mendohej.

Fillimisht, u habitëm që Mirlind Daku nuk ishte në skuadrën e Rubinit për ndeshjen e së dielës në Premier Ligën ruse në fushën e Zenitit, por tashmë habia I ka lënë vend shqetësimit.

Pavarësisht optimizmit të babait të lojtarit, Feimit, dhe të vetë ylli kuqezi, dëmtimi që ai ka nuk paska kaluar. Trajneri i skuadrës nga Kazani, Rashid Rahimov, deklaroi pas ndeshjes së humbur 0-4, se Daku ka një lëndim të vështirë, I cili ndoshta ka nevojë për një operacion të vogël.

Ekziston mundësia që futbollisti I Shqipërisë të mos luajë më këtë sezon, dhe kjo do të thotë jo vetëm goditje për Rubinin, por edhe alarm për kombëtaren kuqezi. Premier Liga ruse mbyllet në 24 maj, pra vetëm dy javë para ndeshjes Shqipëri-Serbi për eliminatoret e Kampionatit Europian.

Sipas parashikimit të trajnerit Rahimov, ekziston mundësia që Daku të mos jetë gati për derbin e Ballkanit në “Arenën Kombëtare” në 7 qershor. Më herët, ai humbi dy ndeshjet e para eliminatore të Botërorit, në Angli dhe në Tiranë ndaj Andorrës për të njëjtin shkak.

Mungesën e Dakut pritet ta ndjejë shumë edhe skuadra nga Tatarstani, pasi shqiptari është njeriu i saj kryesor. Sulmuesi ka 11 gola e 6 asistë në 19 ndeshje të kampionatit rus, dhe me të në fushë është humbur vetëm 30 për qind e ndeshjeve, ndërsa në mungesë të tij, 67 për qind.