Trofeu Italian do mbushë arkën e fituesit dhe finalistëve

4.6 milionë euro do të marrë ekipi që do të fitojë kupën e italisë, ndërsa finalisti do të marrë plotë 2 milionë.  Mediet italianë kanë publikuar shifrat duke vërejtur se ka një rënie të të ardhurave krahasuar me vitin e shkuar.

Kupa e Italisë për edicionin është futur në fazën më vendimtare, dhe këtë mbrëmje, sytë janë të gjithë të drejtuar nga “Derby della Madonnina” mes Milanit dhe Interit, sfidë e vlefshme për ndeshjen e parë gjysmëfinale.

Ndërkohë, Bologna e ka siguruar tashmë biletën për finalen e madhe që do të zhvillohet më 14 maj në stadiumin “Olimpico” të Romës, duke kaluar me sukses raundet paraprake.

Veç lavdisë dhe trofeut, në lojë është edhe një monteprem i majmë financiar. Fitorja e Kupës sjell me vete një shpërblim që shkon deri në gati 7 milionë euro, një shumë që përfshin edhe të ardhurat nga të drejtat televizive ndërkombëtare.

Edhe pse xhirot përfundimtare varen nga të ardhurat nga shitja e të drejtave TV jashtë Italisë, përllogaritjet për edicionin aktual nuk ndryshojnë shumë nga sezoni i kaluar.

Këto janë shifrat e shpërblimeve në Kupa për 2024/25:

Kualifikimi në të tetat e finales: 400.000 euro

Kualifikimi në çerekfinale: 850.000 euro

Kualifikimi në gjysmëfinale: 1.700.000 euro

Finalist (humbës): 2.000.000 euro

Fitues i finales: 4.600.000 euro

Kështu, skuadra që arrin të fitojë trofeun do të arkëtojë një total që mund të arrijë gati 7 milionë euro, pa llogaritur fitimet nga biletat e ndeshjeve në shtëpi.

Në edicionin e kaluar, Juventusi, që fitoi finalen ndaj Atalantës, përfitoi 7,6 milionë euro, ndërsa atalantasit, ndonëse humbën, arkëtuan gjithsesi 5 milionë euro në total, falë kalimit të fazave të mëparshme.