Torres: Ndaj Atletico betejë e vërtetë, tani të fitojmë finalen

Ferran Torres ishte ylli i ndeshjes së dytë gjysmëfinale të Kupës së Mbretit mes Atletico Madrid dhe Barcelona.

Goli i tij vendimtar i dha skuadrës “blaugrana” një fitore të rëndësishme 1-0 në “Metropolitano”.

Sukses që ka çuar katalanasit në finalen kundër Real Madrid. Vetë sulmuesi është shprehur i lumtur për golin e tij: “Ishte një betejë e vërtetë, pasi luhej për të shkuar në finale. Bëmë gjithçka për të fituar dhe ia dolëm”.

“Goli im është rezultat i këmbënguljes, punës dhe besimit“, tha Ferran, duke nënvizuar rëndësinë e golit të arritur. Në lidhje me finalen ndaj Real Madrid, ai shtoi: “Nuk ka favorit në një finale. Është një ndeshje e vetme”.

“Ne do të japim gjithçka dhe me mbështetjen e tifozëve, jemi të sigurt se mund t’ia dalim mbanë për të fituar turneun”, tha Torres, që këtë sezon ka realizuar 16 gola, përfshirë pesë në Kupën e Mbretit.