Përplasja Owen - Van Dijk

Liverpool-i fitoi derbin e Merseyside kundër Evertonit (1-0), duke ruajtur një avantazh prej 12 pikësh në krye të Premier League.

Megjithatë, ajo që po bëhet temë diskutimi është momenti i tensionit midis një lojtari aktual të ‘The Reds’ dhe një legjende të klubit nga qyteti i Beatles.

Pas ndeshjes, Michael Owen, ish-lojtar i Liverpool-it, sugjeroi që, edhe nëse Liverpool fiton Premier League-n, sezoni mund të ketë një fund të hidhur për shkak të eliminimeve të fundit në Kupën e Ligës dhe UEFA Champions League.

"Liverpool-i po bwnte një sezon fenomenal. Nëse fitojnë Premier League, do të jetë ende fantastike, por me një shije të hidhur, sepse ishin duke ndërtuar diçka të veçantë," tha ish-sulmuesi.

Megjithatë, kapiteni Virgil Van Dijk nuk u pajtua me analizën dhe iu përgjigj drejtpërdrejt Owen-it: "Atëherë po thoni se sezoni tashmë nuk do të jetë i veçantë?"

Ish-lojtari e ripërsëriti pikëpamjen e tij, duke thënë se sezoni mund të kishte qenë "diçka shumë më i veçantë", ndërsa qendërmbrojtësi holandez insistoi se fitimi i Premier League mbetet një arritje e jashtëzakonshme dhe mbrojti rëndësinë e titullit: "Mendoj se duhet ta ndryshojmë pak këtë narrativë.

Ne po luftojmë për çmimin më të madh të sezonit. Mbeten tetë ndeshje, e dimë çfarë është në lojë, duhet të vazhdojmë përpara, duhet të luftojmë, duhet të shijojmë çdo moment dhe pastaj do të shohim."

"Siç thashë, ende duket shumë i veçantë për mua. Mendoj se, në fillim të sezonit, askush nuk priste që ne të luftonim në katër fronte.

Sigurisht, tani jemi në një fazë ku po luftojmë për titullin më të rëndësishëm dhe ky është realiteti. Akoma është e mundur që ky sezon të jetë shumë, shumë i veçantë," shtoi ai.

Pavarësisht përgjigjes së Van Dijk, Owen mbajti qëndrimin e tij, duke pranuar se fitimi i kampionatit anglez do të ishte një arritje e madhe, por duke theksuar mundësinë e humbur për diçka "jashtëzakonisht të veçantë".