Muller: Një udhëtim i jashtëzakonshëm, dua ta mbyll me titull dhe Champions

Thomas Müller do të largohet nga Bayern Munich në fund të këtij sezoni.

Lajmi ishte në ajër, por sot ka ardhur zyrtarizimi. 25 vite suksese dhe trofesh që nuk do të harrohen kurrë. Këtë e di shumë mirë lojtari gjerman, i cili, pasi dha lajmin, deshi të përcillte një mesazh të qartë përmes faqes zyrtare të klubit, duke përmendur edhe objektivat e radhës për bavarezët, si finalja e Champions League, që do të luhet në shtëpi dhe që skuadra e Kompany synon ta arrijë:

“Është e qartë se sot nuk është një ditë si gjithë të tjerat për mua. 25 vitet e mia si lojtar i Bayern Munich do të përfundojnë në verë. Ka qenë një udhëtim i jashtëzakonshëm, i formuar nga përvoja unike, takime të mëdha dhe triumfe të paharrueshme. Ndihem jashtëzakonisht mirënjohës dhe i lumtur që pata mundësinë ta ndërtoja këtë karrierë me klubin tim të dashur. Lidhja e veçantë me klubin dhe tifozët tanë të mrekullueshëm do të mbetet përgjithmonë.

Ajo që dëshiroj si lamtumirë është e qartë: tituj që mund t’i festojmë së bashku dhe momente që do t’i kujtojmë me dashuri për një kohë të gjatë. Do të japim maksimumin në javët në vijim për ta rikthyer titullin e kampionit të Gjermanisë në Mynih dhe për ta arritur finalen tonë të shumëdëshiruar ‘në shtëpi’. Ta bëjmë bashkë”.

Njoftimi i klubit bavarez për ndarjen pas 25 vitesh

Në fund, rrugët e Thomas Müller dhe Bayern Munich do të ndahen në fund të sezonit. Pas Kupës së Botës për Klube, sulmuesi gjerman do të largohet nga bardhekuqtë. Lajmin e ka bërë të ditur vetë klubi bavarez përmes një komunikate në faqen zyrtare:

“Fitues i Kupës së Botës, dy herë fitues i tripletës, rekordmen në paraqitje. FC Bayern dhe Thomas Müller, 35 vjeç, kanë vendosur së bashku t’i japin fund një karriere unike, që ka zgjatur 25 vite dhe ka sjellë 33 trofe, këtë verë.

Müller, i lindur në Bavari, u bashkua me akademinë e FC Bayern në moshën 10-vjeçare, në verën e vitit 2000, përjetoi një zhvillim të pashembullt, bëri histori me klubin, fitoi gjithçka që mund të fitohej dhe u bë rekordmeni i paraqitjeve të klubit tonë me gjithsej 743 ndeshje zyrtare”.

Kampionët rekordmenë të Gjermanisë do ta nderojnë karrierën madhështore të Müller, ndër të tjera, edhe me një ceremoni të veçantë. Po ashtu është rënë dakord që fituesi i dyfishtë i tripletës dhe kampioni i botës të luajë ndeshjet e tij të fundit me Bayern-in në Kupën e Botës për Klube të FIFA-s, e cila do të zhvillohet në SHBA nga data 15 qershor deri më 13 korrik.