Scaroni del kundër tifozëve kuqezinj
- Bota Sot
Pas dështimit për të sjellë Paraticin si drejtor të ri sportiv, në shtëpinë e Milanit ka nisur sërish kërkimi për një tjetër person në këtë rol. Emrat në qarkullim janë të shumtë, teksa presidenti Scaroni i komenton kështu:
“Lexoj disa emra që nuk dalin nga ne, më lind dyshimi se shumë duan të vetë-kandidohen. Askush nuk ka marrë aq shumë lojtarë sa ne në merkaton e fundit, tani duam të forcohemi edhe në drejtim”.
Mesazhi për tifozët është i qartë: Milani dëshiron të rikthehet sa më shpejt aty ku i takon, pas një sezoni të paktën zhgënjyes si në Serie A, ashtu edhe në Champions: “Nuk mund të jemi të kënaqur, edhe pse ka diçka pozitive, pasi kemi fituar një trofe duke mposhtur dy skuadra të rëndësishme. Jemi ende në garë për Kupën e Italisë.
Premtojmë angazhim maksimal për sezonin që vjen, jemi tashmë në punë për këtë. Marrëdhënia mes Ibrës dhe Furlanit? I shoh tek punojnë në ‘Casa Milan’ dhe shkojnë për mrekulli bashkë. Rolet e secilit janë të qarta: Zlatan është pjesë e menaxhimit të ‘RedBird’, është ‘i huazuar’ te Milani. Natyrisht, ai mbetet në projekt”.
I pashmangshëm pastaj ishte edhe diskutimi mbi Gerry Cardinale dhe kundërshtimin e fortë nga tifozët e organizuar. “Nuk është i demoralizuar, por më i vendosur se kurrë për të fituar, – ka vazhduar Scaroni.
– Edhe pse nuk është çdo ditë këtu, Cardinale i kushton Milanit shumë orë të ditës së tij. ‘RedBird’ tashmë e ka çuar klubin në rekorde të ardhurash, të cilat janë më shumë se dyfishuar në 4 vitet e fundit (nga 192 në 457 milionë euro, burime të reinvestuara në klub).
Me aftësitë e tij ka qenë shumë i dobishëm për projektin e stadiumit. Disa kontestime ndaj dikujt që ka investuar 1.2 miliardë euro për të blerë klubin nuk janë mënyra më e mirë për të na mbështetur. ‘RedBird’ ka qenë thelbësor për Milanin, rezultatet në fushë janë prioriteti absolut”.
Mbyllja nga ana e Scaronit ishte e gjitha për stadiumin: “Jam optimist, nuk është më vetëm projekti i Interit dhe Milanit, por edhe i administratës komunale. Ne dhe Interi po ecim të përputhur, sepse kemi nevoja të ngjashme. Shtoj se stadiumi që kemi në projekt na lejon të kemi një ambient për familjet, të qasshëm për të gjithë dhe të mbrojtur nga ndikimet kriminale”.
