Elbasani dhe Skënderbeu ndezin “motorët”

Kanë mbetur edhe tri javë nga mbyllja e edicionit 2024-2025 në futbollin shqiptar. Shumë “ekuacione” janë për t’u zgjidhur deri në fund, nga ekipet që do të shkojnë në “Final 4” e deri te skuadrat që ndodhen në zonën e ftohtë të rënies nga kategoria.

Nëse i hedhim një sy trendit të rezultateve në 5 ndeshjet e fundit në kampionat, evidentohet se Elbasani dhe Skënderbu mbajnë “kurorën”.

Elbasani – Në 5 përballjet e fundit të Superiores, elbasanasit nuk e njohin humbjen, e përkthyer me 3 fitore dhe 2 barazime, 11 pikë të grumbullar nga 15 në total, ritëm kampioni.

Fitorja e fundit kundër Egnatias i ndez “dritën e gjelbërt” për të kapur ‘Final 4’. Aktualisht ata ndodhen në vendin e 5-të, 1 pikë më pak se Partizani. 3 ndeshjet e mbetura i kanë kundër rivalëve që luftojnë në fronte të ndryshme, repsektivisht kundër Bylisit, Vllaznisë dhe Partizanit.

Skënderbeu – “Ujqërit” rregjistrojnë 3 fitore në 5 javët pararendëse, sinjale të qarta se ata do të luftojnë deri në fund për të mbijetuar. Triumfi i fundit kundër një rivali direkt për rënien nga kategoria si Laçi, flet qartë.

Duke nisur që javën e ardhshme do luajnë “finalen” e parë me Tiranën, për të vijuar me transfertën në Rrogozhinë dhe më pas e mbyllin në Korçë karshi Bylisit.