Flick ‘buzëqesh’ para ndeshjes me Dortmundin

Lajme të mira për Barcelonën vetëm pak orë para sfidës shumë të rëndësishme të çerekfinales së parë të Ligës së Kampionëve kundër Borussia Dortmundit.

Íñigo Martínez, i përjashtuar nga ndeshja e kampionatit kundër Betisit për shkak të një dëmtimi të lehtë muskulor, është rikthyer në listën e lojtarëve të gatshëm për Hansi Flick.

Qendërmbrojtësi ka kaluar shqetësimin dhe do të jetë i gatshëm për këtë ndeshje të madhe europiane.

Pavarësisht mungesave të disa emrave të rëndësishëm — në veçanti Marc-André ter Stegen, Marc Casadó, Marc Bernal dhe Dani Olmo — Barcelona vjen në këtë përballje në një formë të admirueshme: 23 ndeshje pa humbje në të gjitha kompeticionet dhe me mundësi reale për të luftuar për të gjithë titujt sezonalë.

Skuadra është grumbulluar në hotelin e zakonshëm dhe atmosfera është ajo e ditëve të mëdha.

Lojtarët janë të vetëdijshëm për rëndësinë e fillimit të mbarë përpara publikut të tyre në ‘Estadi Olímpic Lluís Companys’, që pritet të jetë zjarr.

Këta janë lojtarët e grumbulluar nga Flick për ndeshjen e sotme:

Portierë: Szczesny, Iñaki Peña, Koche
Mbrojtës: Cubarsí, Araujo, Balde, Íñigo Martínez, Héctor Fort, Gerard Martín, Christensen, Koundé, Eric Garcia
Mesfushorë: Gavi, Pedri, Pablo Torre, Fermín, Frenkie de Jong
Sulmues: Ferran, Lewandowski, Ansu Fati, Raphinha, Pau Victor, Lamine Yamal