Një telash që i kushton Milanit 4 milionë euro në sezon

Milani gjatë kësaj vere duhet të mendohet mirë për të zgjidhur shumë situata të paqarta kontraktuale të lojtarëve që ka në përbërje, me rinovime që duhen vendosur që në ditët e para pas këtij sezoni.

Por një prej tyre shqetëson në mënyrë të veçantë kuqezinjtë, pasi bëhet fjalë për një futbollist i cili nuk ka më leje të stërvitet në qendrën e ekipit, por ndërkohë përfiton 4 milionë euro rrogë në vit.

Bëhet fjalë për sulmuesin belg Divok Origi, i cili ishte një nga dështimet më të bujshme të merkatos së klubit italian. I afruar me bujë nga Liverpuli, dëmtimet dhe mungesa e formës bënë që lojtari të dilte jashtë planeve të kuqezinjve, në këtë sezon, atij iu bë e qartë se nuk kishte më vend për të në klub.

Origit iu dha mundësia që të luante me Milan Futuro, skuadrën e U23, por ai e refuzoi.

Ndaj që atëherë atij iu hoq aksesi në qendrën stërvitore të Milanit dhe futbollisti është stërvitur në mënyrë individuale në Firence.

Por gjatë kësaj kohe, ai ka përfituar rregullisht rrogën e tij prej 4 milionë eurosh neto në sezon, duke mbetur një barrë financiare për klubin.

Kontrata e tij mbaron në verën e vitit 2026, ndaj gjatë kësaj vere, kuqezinjtë duhet t’i gjejnë një sistemim atij për të shmangur barrën e rëndë financiare, që shkon në 5,2 milionë euro bruto në bilanc për një tjetër sezon.