Cristiano Ronaldo dhe ‘thatësira’ më e gjatë e karrierës

Cristiano Ronaldo, një prej futbollistëve më të suksesshëm në historinë e këtij sporti, ka qenë për më shumë se 20 vite i mësuar të ngrejë trofe dhe të festojë fitore madhore.

Që nga debutimi me Sportingun më 14 gusht 2002, e deri në maj të vitit 2021, portugezi ka fituar 31 tituj zyrtarë kolektivë, duke lënë pas një trashëgimi të pasur.

Në këtë numër nuk përfshihen disa kupa jozyrtare si Kupa e Unionit të Shoqatave Arabe të Futbollit apo Superkupa Cândido de Oliveira e 2002-shit, pasi nuk ka luajtur në ato ndeshje.

Por pas vitit 2021, gjithçka ndryshoi. Pas Kupës së Italisë të fituar me Juventusin, Ronaldo nuk ka arritur të shtojë asnjë trofe madhor në koleksionin e tij.

Janë katër vite pa trofe të rëndësishëm, periudha më e gjatë pa suksese në karrierën e tij brilante.

Rikthimi i pafat në Manchester United

Në verën e vitit 2021, Ronaldo vendosi të rikthehej te Manchester United, duke shpresuar në një mbyllje të lavdishme të karrierës në klubin ku u bë yll.

Pavarësisht formës së mirë personale në sezonin e parë (24 gola në 38 ndeshje), “Djajtë e Kuq” nuk fituan asnjë titull dhe përfunduan në vendin e gjashtë në Premier League, jashtë zonës së Champions League.

Në sezonin pasues, marrëdhëniet me trajnerin Erik ten Hag u përkeqësuan. Ronaldo u la në stol, shprehu publikisht pakënaqësinë e tij dhe në dhjetor 2022 e mbylli në mënyrë të ftohtë aventurën e dytë në ‘Old Trafford’.

Shpresa dhe zhgënjim në Arabinë Saudite

Pas Kupës së Botës 2022, Ronaldo mori një vendim të befasishëm duke nënshkruar me Al Nassr në Arabinë Saudite. Kalimi i tij u shoqërua me shumë bujë, por nuk u përkthye në suksese ekipore.

Në sezonin e parë, Al Nassr përfundoi në vend të dytë në kampionat dhe u eliminua në gjysmëfinalet e Kupës dhe Superkupës.

Në sezonin pasues, ndonëse Ronaldo shkëlqeu personalisht me 50 gola në 51 ndeshje, klubi sërish nuk fitoi asnjë trofe madhor: vendi i dytë në kampionat, humbje në finalen e Kupës, eliminim në gjysmëfinale të Superkupës dhe në çerekfinale të Ligës së Kampionëve Aziatike.

Në moshën 39-vjeçare, Cristiano Ronaldo vazhdon të shkëlqejë si individ, por i mungon diçka që gjithmonë e ka dalluar: fitimi i trofeve të rëndësishëm.

Tashmë, ai ndodhet në periudhën më të gjatë pa tituj të mëdhenj në karrierën e tij – një “thatësirë” që sado e pazakontë për të, i rikujton se suksesi kolektiv nuk është gjithmonë i garantuar, pavarësisht madhështisë së një lojtari.