Superkupa e Italisë do të luhet përsëri në Arabi, format me 4 ekipe

Edicioni i radhës i Superkupës së Italisë do të luhet sërish në Arabinë Saudite.

Gjatë Asamblesë së Serisë A të mbajtur me video-konferencë mëngjesin e sotëm, shefi ekzekutiv i Lega Serie A, Luigi De Siervo, zbuloi se kishte marrë konfirmimin e interesimit nga organizatorët arabë për të pritur edicionin e radhës të Superkupës me formatin me 4 ekipe.

Milani dhe Bolonja, finalistët e Kupës së Italisë, me siguri do të kualifikohen, ndërsa dy skuadrat e tjera në start duhet të jenë Napoli dhe Interi, të cilët po luftojnë për titull.

Marrëveshja e nënshkruar në mars 2023, e cila parashikon që 4 nga 6 edicionet të luhen në Arabinë Saudite, ka një vlerë totale prej 92 milionë euro.

Çdo vit Riadi paguan 23 milionë për të pasur Superkupën e Italisë: 6.8 shkojnë direkt në arkat e Ligës, ndërsa 16.2 të mbetura ndahen mes katër pjesëmarrësve, 8 për fituesin, 5 për finalistin dhe 1.6 për dy gjysmëfinalistët.