Kjo është nota për Asllanin

Nëse Interi mban ende të gjallë një fije shprese për titullin kampion, kjo i dedikohet mbi të gjitha Kristjan Asllanit. I thirrur të zëvendësojë Hakan Calhanoglu në kuadrin e rotacionit të thellë të vendosur nga Inzaghi, “regjisori” shqiptar jo vetëm që mori përsipër zonën e fushës që i përket turkut, por edhe detyrat si ekzekutues penalltish. Më në fund, një paraqitje që nuk lë hapësirë për nostalgji ndaj shokut të skuadrës.

“Nga Calhanoglu trashëgon edhe detyrën e ekzekutuesit të penalltive, i ftohtë nga pika e bardhë. Gati sa nuk realizon një dopietë nga distanca, shqiptari e bën Interin të ‘rrotullohet’ në një ritëm të moderuar, që i mjafton për ta çuar ndeshjen drejt fitores, e cila nuk u vu asnjëherë në diskutim”, – shkruan “TuttoMercatoWeb”, që i jep notën 7 si vlerësim.

Po me notë 7 e vlerëson edhe “Corriere dello Sport”: “Për shkak të pezullimit të Calhanoglu, shqiptari e nisi titullar në ‘regjinë’ e skuadrës zikaltër dhe e imitoi turkun nga pika e bardhë për t’i dhënë fund ‘thatësirës’ së golit në Serie A, që zgjaste prej më shumë se një viti. Asllani kishte nevojë për një mbrëmje të tillë, që të forconte vetëbesimin”.

Edhe portali i afërt me Interin, “L’Interista”, i vendosi notën maksimale 7: “Jo Zielinski, por ai nga pika e bardhë. Asllani veshi mantelin e superheroit, si ‘Super-Calhanoglu’, dhe zhbllokoi një ndeshje potencialisht të rrezikshme me goditje të papritshme nga penalltia. Arkitekti i mesfushës zikaltër, edhe në 3/4 e fushës. Goli i tij i dytë sezonal, pas atij ndaj Lazios”.

Pak më të moderuar janë vlerësimet nga “Gazzetta dello Sport” dhe “Tuttosport”, që i vendosin notën 6.5 shqiptarit.
“Gazzetta” shkruan: “Tri gjëra të mira, më të mirat në të gjithë Interin: penalltia, goditja me të djathtën nga jashtë zone dhe asisti me kokë për Arnautovic. Kristjan meriton komplimentet e shokëve të skuadrës”.

Ndërsa “Tuttosport” komenton: “E merr topin dhe shkon vetë te pika e bardhë si një zëvendës i vërtetë i Calhanoglu, por spikat edhe në fund të pjesës së parë me një tjetër goditje. Mbrëmje pozitive për të”.

Notat e Kristjan Asllanit:
“TuttoMercatoWeb”: 7
“Gazzetta dello Sport”: 6.5
“Corriere dello Sport”: 7
“Tuttosport”: 6.5
“Corriere della Sera”: 7
“La Repubblica”: 7
“L’Interista”: 7