Bastoni për Yamal: Një përbindësh!

Pas triumfit historik të Interit ndaj Barcelonës dhe kualifikimit në finalen e Champions League, Alessandro Bastoni ka emocionuar tifozët me dy postime domethënëse në rrjetet sociale.

I pari, menjëherë pas ndeshjes, ishte një shpërthim gëzimi: “Do të shihemi në Mynih!”. Ndërsa i dyti, më i reflektuar, u publikua një ditë më pas, duke përmbledhur emocionet dhe përkushtimin e skuadrës.

Në postimin e tij në Instagram, Bastoni falënderoi shokët e skuadrës dhe tifozët për përkrahjen e jashtëzakonshme, duke theksuar se përpjekja në fushë ishte shpërblyer me një arritje të paharrueshme:

“Vetëm tani po filloj ta kuptoj çfarë arritje të pabesueshme realizuam të martën. Sakrifica që lamë në atë fushë ishte e jashtëzakonshme, por gjithçka u shpërblye nga energjia e paharrueshme e tifozëve tanë.”

Më tej, ai shprehu respekt për kundërshtarët dhe veçanërisht për një prej tyre, Lamine Yamal. “Respekt për kundërshtarët tanë: treguan forcë dhe zemër të jashtëzakonshme,” – shkroi Bastoni, duke shtuar: “Një përmendje speciale për një djalosh jashtëzakonisht të talentuar: Lamine Yamal, je një ‘përbindësh’.”

Postimi i Bastonit u bë viral në Spanjë, ku mediat si Mundo Deportivo dhe faqet e tifozëve të Barcelonës vlerësuan gjestin sportiv të mbrojtësit italian. Në fund të ndeshjes, Bastoni dhe Yamal shkëmbyen fanellat, duke e mbyllur një duel emocional në krahun e majtë të fushës me ndjenjë respekti të ndërsjellë.