Jordi Alba rinovon me Inter Miamin

Ish-mbrojtësi i përfaqësueses së Spanjës, Jordi Alba, ka rënë dakord për një zgjatje të kontratës me dy vite me skuadrën amerikane Inter Miami, që do ta mbajë në klub deri në përfundim të sezonit 2027 në Major League Soccer (MLS), njoftoi klubi të enjten.

Mbrojtësi 36-vjeçar, i cili iu bashkua Inter Miami në vitin 2023 pas një periudhe 11-vjeçare me gjigantët spanjollë të Barcelonës, ka qenë një figurë kyçe në suksesin e klubit që prej mbërritjes së tij.

“Jam i lumtur që po rinovoj kontratën, sepse kam ende dëshirë të vazhdoj të garoj,” tha Alba në një deklaratë.

“Kam qenë shumë rehat gjatë këtyre dy viteve në klub, dhe ndjehem shumë i dashur nga të gjithë tifozët,” shtoi ai.

“Kemi ende dëshirë të garojmë, të vazhdojmë të fitojmë, dhe shpresojmë të fitojmë sa më shumë trofe të jetë e mundur.”

Alba ndihmoi Inter Miami të fitonte Supporters’ Shield sezonin e kaluar, me klubin që vendosi një rekord pikësh për një sezon të vetëm.

Në Miami, ai është ribashkuar me ish-shokët e tij të Barcelonës: Lionel Messi, Sergio Busquets dhe Luis Suarez, si dhe me Javier Mascherano, i cili tani është trajneri i parë i ekipit.