Real Madridi ia mësyn mesfushorit që po konsiderohet si Toni Kroos i ri

Një mesfushor i ri mund të jetë lart në listën e objektivave të verës për Xabi Alonson në rikthimin e tij të shumëpritur te Real Madridi.

Emërimi i Alonsos si trajneri i ri i madrilenëve pritet të nisë një valë transferimesh si pjesë e një epoke të re për klubin.

Mbrojtësi i Liverpoolit, Trent Alexander-Arnold, është pranë përfundimit të transferimit të tij të shumëpritur si lojtar i lirë, ndërkohë që po bëhen përparime të mëdha edhe për transferimin e Dean Huijsen.

Këta dy lojtarë do të mbulojnë dy zona kyçe që Alonso ka në vëmendje – por, si një ish-mesfushor vetë, ai po konsideron edhe përforcime në “dhomën e motorit” të ekipit.

Luka Modric mund ta përfundojë aventurën e tij me klubin nëse vendos të mos rinovojë kontratën, ndërkohë që hapësira e lënë nga largimi i Toni Kroos në vitin 2024 ende nuk është plotësuar.

Sipas raportimeve nga Daily Mail, një lojtar që është vëzhguar rregullisht nga Real Madridi – për shkak të krahasimeve me Kroos – është mesfushori organizator i Crystal Palace, Adam Wharton.

Real Madridi ka ndjekur Wharton që nga fillimi i vitit 2025, me paraqitjet e tij të pjekura dhe të qeta në mesfushën e Palace që kanë marrë lëvdata të shumta.

Aftësia e tij për të diktuar ritmin e lojës nga thellësia dhe për të kaluar linjat me pasime të sakta e të thella ka bërë që të krahasohet me Toni Kroos.

Vetëbesimi i Wharton dhe dëshira e tij për t’u përmirësuar vazhdimisht janë vlerësuar nga trajneri i ri i Anglisë, Thomas Tuchel, dhe Los Blancos po e ndjekin me kujdes.

Megjithatë, Wharton ka kontratë me Crystal Palace deri në vitin 2029, ndaj klubi nuk është nën presion për ta shitur dhe mund të kërkojë rreth 60 milionë paund.

Jude Bellingham luajti një rol kyç në bindjen e Alexander-Arnold për t’iu bashkuar Real Madridit, pasi të dy kanë krijuar një shoqëri të fortë gjatë grumbullimeve me kombëtaren angleze.

Wharton, që është vetëm 21 vjeç, është më i ri në skenën ndërkombëtare të Anglisë, por ambiciet e tij mund të shtrihen deri në Madrid nëse vendos të largohet nga Premier League.