Interi, i tërbuar me vendimet e arbitrave kundër tij.

Heshtje, zemërim, më pas fokusi te ndeshja e radhës në kampionat ndaj Comos. Interi ndjen se ka humbur shanset e fundit për titullin në barazimin 2-2 në “San Siro”, ndaj Lazios. Në përfundim të ndeshjes, asnjë zyrtar apo lojtar zikaltër nuk u paraqit për të folur për mediat.

Një vendim që, sipas asaj që ka rrjedhur nga klubi, vjen si pasojë e pakënaqësisë për mënyrën si u menaxhua ndeshja nga arbitri. Pakënaqësia është jo vetëm ndaj Chiffi, por gjykimit gjatë gjithë sezonit.

Pikërisht te kjo pakënaqësi ndalet edhe “La Repubblica”.

Gjatë së martës, në ditën e dytë të stërvitjes për javën, Simone Inzaghi, i cili të enjten pritet të ketë sërish në grup Frattesi dhe Lautaro për të vlerësuar gjendjen e tyre para sfidës në fushën e Comos, nuk mbajti ndonjë fjalim të veçantë në “Appiano Gentile”. Vetëm një mesazh: të japim maksimumin. Më pas do të vijë momenti për të folur.

Trajneri dhe vetë presidenti Beppe Marotta janë të bindur se sezonin e tyre e ka dëmtuar edhe një seri vendimesh të padrejta arbitrare.

Një mendim që, sipas të përditshmes italiane të cituar më sipër, Marotta është gati ta çojë në Këshillin e ardhshëm Federal të FIGC, për të ngritur zërin dhe mbrojtur “peshën” e Interit, ose të paktën për të denoncuar padrejtësitë që klubi mendon se ka pësuar gjatë sezonit.

Megjithatë, beteja e parë është ajo në fushë. Objektivi është fitorja të premten në mbrëmje ndaj Comos, duke shpresuar në një ndihmë nga Napoli në përballjen ndaj Cagliarit në “Maradona”.