Inzaghi nuk di si të përgjigjet për të ardhmen e tij

Simone Inzaghi mund të mos jetë më në stolin e Interit për Kupën e Botës për Klube që nis më 18 qershor në SHBA.

Pas humbjes së rëndë ndaj PSG-së në finalen e Ligës së Kampionëve, trajneri italian duket i tunduar nga oferta marramendëse e Al-Hilal. “Nuk di si t’i përgjigjem kësaj,” u shpreh ai.

Interi ka luajtur dy finale të Ligës së Kampionëve në vetëm tre vite, një arritje e madhe për një klub me burime më të kufizuara financiare krahasuar me gjigantët e tjerë evropianë. Meritat për këtë sukses i janë njohur Inzaghit gjatë gjithë këtyre viteve.

Megjithatë, disfata e thellë 5-0 ndaj Paris Saint-Germain në Munich duket se ka vulosur fundin e një cikli dhe për herë të parë që prej ardhjes së tij në 2021, Inzaghi e përfundon sezonin pa asnjë trofe të fituar.

Prej javësh përflitej se trajneri ishte i prirur të pranonte ofertën e Al-Hilal, që i ofron një pagë prej 30 milionë eurosh në sezon. Deklaratat e tij pas finales vetëm sa shtuan spekulimet për një largim të afërt.

I pyetur nëse do të jetë në stol për Kupën e Botës për Klube, ai u përgjigj me pasiguri. “Nuk di si t’i përgjigjem kësaj pyetjeje. Jam këtu nga respekti pas një humbjeje shumë të dhimbshme.”

Megjithatë, ai nuk harroi të theksonte shpirtin luftarak të skuadrës: “Ekipet forcohen nga humbjet, kjo mund të tingëllojë si një klishe, por është e vërtetë. E kemi treguar në të kaluarën, kur fituam Scudetton”, tha trajneri italian.

Inzaghi pranoi zhgënjimin, por theksoi se PSG-ja ishte më e mirë këtë herë. “Ka zhgënjim, por duhet ta mbajmë kokën lart. U përballëm me një ekip që e meritoi fitoren”.

Në lidhje me të ardhmen, ai u tregua i rezervuar: “Kemi zhvilluar 58 ndeshje që nga 13 korriku. Të flasësh për të ardhmen tani nuk ndihet e drejtë”.

Ndërkohë, Gianluca Di Marzio nga Sky Sport Italia konfirmon se Al-Hilal është optimist për të bindur trajnerin të marrë drejtimin.