Inflacioni në Eurozonë bie nën objektivin e synuar

Ndërsa një trend pozitiv ishte i dukshëm në tregjet e aksioneve evropiane dje, të dhënat makroekonomike të shpallura në rajon u ndoqën me vëmendje nga investitorët, sipas Anadolu.

Inflacioni vjetor në Eurozonë ra në 1.9 për qind në maj, ndërsa shkalla e papunësisë e rregulluar sipas sezonalitetit ishte 6.2 përqind në prill. Kjo shkallë ishte regjistruar si 6.4 për qind në Eurozonë dhe 6 për qind në BE në prill të vitit të kaluar.

Analistët deklaruan se të dhënat e inflacionit ishin nën objektivin 2 për qind të Bankës Qendrore Evropiane (ECB), dhe se është pothuajse e sigurt që ECB do të ulë normën e interesit për 25 pikë bazë në mbledhjen e së enjtes.

Nga ana tjetër, Guvernatori i Bankës së Anglisë (BoE), Andrew Bailey, deklaroi se pasiguritë e krijuara nga politikat globale tregtare ushtrojnë presion mbi rritjen ekonomike dhe se ata do të vazhdojnë qasjen e tyre graduale dhe të kujdesshme për uljen e normave të interesit në këtë mjedis.

Zhvillimet politike dhe gjeopolitike në rajon po monitorohen gjithashtu.

Kryeministrja italiane Giorgia Meloni dhe presidenti francez Emmanuel Macron diskutuan në Romë sfidat me të cilat përballet Bashkimi Evropian (BE) dhe mënyrat për ta forcuar atë në përgjigje të tyre, si dhe luftën në Ukrainë dhe zhvillimet në Lindjen e Mesme.

Dje, indeksi DAX 40 në Gjermani u rrit për 0.67 përqind, indeksi FTSE MIB 30 në Itali u rrit me 0.23 përqind, indeksi FTSE 100 në Angli u rrit për 0.15 përqind dhe indeksi CAC 40 në Francë u rrit për 0.34 për qind.