Sllovenia mund të largohet nga NATO – kryeministri me referendum kërkon braktisjen e aleancës

Kryeministri i Sllovenisë, Robert Golob, ka ndezur një debat të fortë politik në vend, duke propozuar organizimin e një referendumi kombëtar për të përcaktuar të ardhmen e rolit të Sllovenisë në NATO.

Lëvizja vjen në kohën kur qeveria ka miratuar rritjen e shpenzimeve ushtarake në përputhje me objektivat e aleancës transatlantike, përkundër kundërshtimeve të brendshme, raporton politico.eu.

Sipas planit të qeverisë, shpenzimet ushtarake do të rriten gradualisht në 2 për qind të Prodhimit të Brendshëm Bruto deri në vitin 2030, ndërsa një tjetër 1.5 për qind do të dedikohet për investime në fusha me përdorim të dyfishtë si shëndetësia, siguria kibernetike dhe infrastruktura kritike.

“Nëse jemi anëtarë të NATO-s, atëherë duhet të marrim përgjegjësi. Nëse jo, le ta thotë populli fjalën e tij,” deklaroi Golob në një konferencë për shtyp, duke e paraqitur referendumin si një mundësi për qytetarët të zgjedhin mes një angazhimi të plotë në NATO apo një rishikimi të pozicionit të vendit.

Megjithatë, partnerët e koalicionit qeverisës, përfshirë Partinë Socialdemokrate (SD) dhe të majtën radikale Levica, kanë shprehur rezerva të thella. Ata paralajmërojnë se rritja e shpenzimeve ushtarake mund të cenojnë sistemin social dhe të çojë në një “militarizim të panevojshëm” të vendit.

“Qytetarët nuk kanë votuar për një shtet ushtarak, por për një shtet social dhe solidar,” deklaroi një përfaqësues i Levica-s në parlament.

Nisma e Golob vjen në një moment të rëndësishëm për aleancën e NATO-s, me samitin e saj vjetor që pritet të theksojë rëndësinë e shpërndarjes së barrës ushtarake mes anëtarëve. Sllovenia, një vend i vogël me rol strategjik në Ballkanin Perëndimor, është përballur me kritika të përsëritura nga aleatët për mungesën e investimeve në mbrojtje.

Kryeministri ka theksuar gjithashtu se Sllovenia do të angazhohet në përpjekjet për paqen në Ukrainë vetëm përmes strukturave të NATO-s, duke përjashtuar çdo përfshirje të njëanshme ose jashtë kornizës së aleancës.

Në sfondin e tensioneve gjeopolitike dhe sfidave të sigurisë në Evropë, fati i referendumit pritet të shërbejë si një provë e vërtetë për orientimin strategjik të Sllovenisë në dekadën e ardhshme.