Deco, gjenerues milionash për Barcelonën

Barcelona po kalon sërish ditë të vështira për të regjistruar lojtarët e saj. Nuk është diçka e re, kjo është bërë tashmë një histori e përsëritur në çdo merkato, ku klubi “blaugrana” duhet të manovrojë me shitje dhe ulje pagash për të respektuar rregullin 1:1 dhe për të mos e tejkaluar masën e pagave.

Drejtori sportiv, Deco, është përballur me një sfidë të madhe këtë verë: të ruajë fuqinë e skuadrës pa shitur lojtarët kryesorë. Për këtë, ai ka përdorur kreativitet dhe strategji të ndryshme, duke arritur rezultate që i kanë sjellë madje edhe urime publike nga presidenti Laporta.

"Ka një rregullore dhe, pa u ankuar, duhet të gjejmë zgjidhje me shitje, largime, rinovime… Është një sfidë çdo javë, por përpiqemi t’i rregullojmë të gjitha,” tha Deco të shtunën e kaluar.

Shitjet dhe të ardhurat

Barcelona ka arritur disa largime që kanë sjellë të ardhura:

Pau Víctor u transferua te Braga për 12 milionë euro;

Pablo Torre, tani lojtar i Mallorcës, solli 5 milionë euro;

Álex Valle u ble nga Como për 6 milionë euro, pasi më herët ishte aty në huazim;

Nga ekipi i të rinjve, klubi ka fituar gjithsej 2,7 milionë euro: Sergi Domínguez (1,2M), Noah Darvich (1M) dhe Álex Collado (0,5M).

Ulja e masës së pagave

Në këtë drejtim, Deco ka arritur të kursejë shumë:

Lenglet u largua pas prishjes së kontratës, duke u bashkuar me Atlético Madridin;

Ansu Fati u huazua te Monaco, pasi më parë uli rrogën përmes rinovimit;

Koundé rinovoi me kushte të reja, duke ulur ndjeshëm pagën;

Iñigo Martínez u transferua te Al Nassr, çka liroi mbi 8 milionë euro.

Në total, këto lëvizje kanë liruar rreth 25 milionë euro nga buxheti i pagave.

Të ardhura shtesë nga klauzolat

Barça ka përfituar gjithashtu nga klauzolat e ish-lojtarëve:

Todibo (West Ham) solli 7,8 milionë euro;

Reits, Jutglá dhe Moriba kontribuan me 2,7 milionë euro;

Për Trincao, Deco shiti përqindjen e të drejtave për 11 milionë euro, një operacion i konsideruar shumë i suksesshëm.

Hapat e radhës

Tani Barcelona duhet të krijojë hapësirë për të regjistruar Szczesny-n dhe Gerard Martín. Plani është të ndërpritet kontrata me Oriol Romeu, si dhe të rinovohet kontrata e Iñaki Peñës për t’u huazuar, gjë që do të lejojë regjistrimin e portierit polak.