Goli i 7 i sezonit në Serinë B pas 3 minutash në fushë, sulmuesi shqiptar që refuzoi Partizanin

Silvio Merkaj po kalon një sezon shumë të mirë në Serinë B, ku po gjen me rregullsi rrjetën me fanellën e Sudtirol.

Sulmuesi shqiptar ka gjetur sot rrugën e rrjetës për herë të shtatë në këtë edicion, duke shënuar në ndeshjen e skuadrës së tij kundër Barit në transfertë.

I aktivizuar vetëm në fillimin e pjesës së dytë të ndeshjes, sulmuesit iu deshën vetëm 3 minuta për të tundur rrjetën, pasi me një devijim prej bomberi të mirëfilltë çoi sferën në rrjetë duke i dhënë avantazhin skuadrës së tij.

Me këtë gol, Merkaj u shkëput nga Stiven Shpendi, i cili është ndalur në kuotën e 6 golave deri tani në Serinë B, duke qenë një pas Kristian Shpendit i cili ka arritur kuotën 8 në atë që mund të cilësohet gara e bomberave shqiptarë në këtë kampionat.

Merkaj ishte shumë pranë Partizanit disa vite më parë, por në fund refuzoi ofertën e të kuqve, duke vazhduar karrierën në Itali.