Barcelonës i propozojnë transferimin e yllit të Manchester Cityt

Barcelonës i është propozuar transferimi i Jeremy Doku si një opsion për të përforcuar sulmin e tyre në ditët e fundit të merkatos së dimrit. Përfaqësuesit e anësorit belg kanë kontaktuar bordin e Barçës për të negociuar një huazim të mundshëm deri në fund të sezonit.

Ardhja e Savinhos dhe nënshkrimi i fundit i Omar Marmoush, për të cilin Manchester City shpenzoi rreth 80 milionë euro, e kanë kthyer Dokun në një rol dytësor nën drejtimin e Pep Guardiolës.

I pakënaqur me minutat e pakta, anësori i është drejtuar agjentëve të tij për të eksploruar alternativa jashtë “Etihad”, ndërsa Barcelona është një nga skuadrat që do t’i përshtatej shumë profilit të belgut.

Megjithatë, Barcelonës do t’i duhet të lehtësojë faturën e pagave për t’i lënë vend belgut, një skenar i pamundur për shkak të vështirësive në sigurimin e daljeve në këtë treg.