Rodri: E vështirë të jesh jashtë

Mesfushori i Mançester Sitit, Rodri, ka folur për rëndësinë e qasjes së dëmtimit të tij të rëndë në gju me një mentalitet pozitiv.

Fituesi i “Topit të Artë”, nuk ka luajtur që nga barazimi 2-2 i “Qytetarëve” me Arsenalin më 22 shtator dhe zakonisht me një dëmtim të ligamentit parësor të kruçatës, një futbollist e ka të humbur sezonin.

Por 28-vjeçari nuk është dorëzuar ende. Ai po lufton për të luajtur sërish këtë sezon dhe Pep Guardiola dëshiron që të jetë gati për çdo skenar, duke e përfshirë madje në listën e Champions-it.

Duke folur në “Super Bowl LIX” në Nju Orlins të dielën, mesfushori spanjoll tha: “Dëmtimet janë pjesë e jetës. Ne jemi të ekspozuar ndaj këtyre lloj gjërave.

Por unë jam një djalë shumë pozitiv në kuptimin që e marr për atë ashtu siç është. Gjithmonë falënderoj Zotin për gjithçka dhe në këto lloj momentesh, përpiqem të jem pozitiv dhe të bëj të gjitha gjërat që nuk je mësuar të bësh, si të vish këtu (në Super Bowl), të kalosh më shumë kohë me familjen tënde dhe pse jo të përpiqesh të përmirësohesh në pjesë të tjera të trupit, të punosh për këtë dhe të kthehesh më i fortë”.

Por Rodri pranon se po i mungon fusha: “Nuk është ndjesi e bukur duke e parë nga jashtë. Ju jeni më nervoz dhe nuk mund të kontrolloni atë që po ndodh, por unë përpiqem të mbështes ekipin tim nga jashtë, t’u jap atyre vizionin tim dhe t’i ndihmoj”.