Merret me këtë sport çdo ditë

Nëse në vitin 2024 ishte Neymar, ai që nuk mundi t’i rezistonte magjepsjes së padelit, këtë vit është superylli global Cristiano Ronaldo që rrëfeu pasionin e tij të madh për këtë sport.

Një pasion që është kthyer në ritual të përditshëm në fushën e padelit, qoftë ajo në shtëpinë e tij, në një resort luksoz apo në një klub ekskluziv. Për Ronaldon, e rëndësishme është të luajë. Dhe, nëse është e mundur, të ndjekë edhe ndeshjet e kampionëve të padelit.

Kështu ndodhi edhe të dielën e kaluar në Riad, ky ylli i futbollit mbështeti kampionët e padelit. Në tribunat e “Padel Rush Arena”, e cila priti eventin e hapjes së sezonit të “Qatar Airways Premier Padel”, u shfaq superylli global, i njohur nga të gjithë si CR7, një nga futbollistët më të mëdhenj të të gjitha kohërave.

Ashtu si bashkëkombësit e tij, vëllezërit Nuno dhe Miguel Deus, të cilët u kualifikuan në turneun kryesor të P1 në Arabinë Saudite, Ronaldo u ul në një “sky box” luksoz, duke mos humbur asnjë pikë të ndeshjes së tyre. Pasioni i CR7 për padelin është i njohur dhe ai vetë e ka pohuar me një deklaratë të drejtpërdrejtë: “Luaj çdo ditë”.

Ai luan sa herë ka mundësi në Arabinë Saudite, në momentet e lira nga angazhimet me Al-Nassr, por nuk ndalet as në Portugali. Ai ka investuar në sportin e padelit, duke blerë “Lisboa Racket Centre” dhe planifikuar ndërtimin e një qendre me 17 fusha në Oeiras, e cila do të shërbejë edhe si selia e Federatës Portugeze të Padelit.

Ronaldo nuk e ka humbur as mundësinë për të luajtur me numrin 1 të renditjes së FIP, Arturo Coello, një moment që është dokumentuar në kanalin e tij në YouTube dhe që ka arritur mbi 2 milionë shikime.

Pasioni për padelin nuk është vetëm një fenomen mes futbollistëve, por ka përfshirë edhe yje të tjerë të sportit botëror. Charles Leclerc, Lando Norris dhe Max Verstappen janë fotografuar duke luajtur padel në Doha, disa ditë para një gare të Formula 1.

Basketbollisti i NBA-së Jimmy Butler, kampion me Golden State Warriors, gjithashtu është i pasionuar pas këtij sporti. Tony Parker, ish-ylli i NBA-së, ka marrë përsipër promovimin e padelit, ndërsa këngëtari dhe biznesmeni Daddy Yankee është pronar i një ekipi padeli në SHBA.

Pasioni për këtë sport është përhapur edhe në botën e tenisit dhe golfit, me ish-numrin një të tenisit Andy Murray, dhe legjendat e golfit Tiger Woods e Justin Timberlake që kanë investuar në ndërtimin e 10 fushave të padelit në një kompleks luksoz në Miami. Edhe yjet e Hollivood-it, si Shakira, Enrique Iglesias, Antonio Banderas dhe Eva Longoria, nuk mund t’i rezistojnë magjepsjes së këtij sporti. Dhe ky trend vetëm sa po rritet.