Tifozët të pakënaqur pas humbjes në Wembley

Humbja 2:0 e Shqipërisë ndaj Anglisë në Wembley ka sjellë pakënaqësi të madhe te tifozët kuqezi.

Edhe pse diferenca e nivelit mes dy kombëtareve është e dukshme, kritikat nuk kanë munguar, veçanërisht për qasjen taktike të trajnerit Silvinjo. Mungesa e guximit për të dalë përpara dhe për të rrezikuar ka lënë një shije të hidhur te tifozët shqiptarë, të cilët prisnin një qëndrim më dinjitoz në një nga stadiumet më prestigjioze në botë.

Një ndër reagimet më të forta ka ardhur nga Nijas Lena, ish-futbollisti nga Struga dhe një tifoz i zjarrtë i Kombëtares, i cili ndjek kuqezinjtë kudo që ata luajnë. Përmes një postimi në rrjetet sociale, ai ka kritikuar ashpër Silvinjon për strategjinë e tij mbrojtëse dhe mungesën e besimit te lojtarët.

Reagimi i Nijas Lenës:

“Nuk di nga t’ia filloj me ty, Silvinjo i nderuar… E dinim që je frikacak, që nuk ke besuar kurrë te lojtarët e tu dhe që nuk ke bërë asnjë ndryshim taktik në dy vite e gjysmë. Por që t’i ofendosh lojtarët e tu, që vijnë nga Chelsea e Interi, duke i mbajtur 90 minuta në 20 metra larg portës sikur të ishin amatorë, është e papranueshme!”

Lena vazhdon më tej duke kritikuar faktin që Shqipëria nuk arriti të kishte asnjë gjuajtje në portën kundërshtare gjatë gjithë ndeshjes:

“Të luash në Wembley, një ndër stadiumet më të rralla në botë, dhe të mos mendosh për ata mijëra tifozë shqiptarë që udhëtuan nga çdo cep i globit për të parë Kombëtaren, është zhgënjim total. Nuk ta kemi borxh këtë lloj qasjeje, këtë injorim e mosbesim ndaj lojtarëve!”

Gjithashtu, ai e kritikon trajnerin për mungesën e reflektimit pas ndeshjes:

“Mendoj që të paktën, minimumi, ishte të kërkoje falje për këtë performancë dhe jo të mburreshe që nuk hëngrët 5 gola. Më keq se kaq nuk mund të bëjë Kombëtarja, ndaj shpresoj që në ndeshjen e radhës nuk do të shohim më një Shqipëri kaq të frikësuar.”

Çfarë pritet të ndodhë më tej?

Ndërsa Shqipëria përgatitet për sfidat e ardhshme, presioni mbi Silvinjon sa vjen e rritet. Kombëtarja ka treguar përmirësime të mëdha nën drejtimin e tij, por ndeshjet e mëdha kërkojnë më shumë guxim dhe fleksibilitet taktik. Tifozët kuqezi nuk kërkojnë fitore me çdo kusht, por duan një ekip që të luftojë dhe të përfaqësojë Shqipërinë me dinjitet në arenën ndërkombëtare.

A do të reagojë Silvinjo ndaj këtyre kritikave? Mbetet për t’u parë në ndeshjet e ardhshme!