Suedia pritet të investojë miliona euro për të modernizuar bunkerët e mbrojtjes civile

Suedia, ku autoritetet kanë paralajmëruar se vendi duhet të përgatitet për rrezikun e luftës, ka njoftuar një investim prej 100 milionë kronash (rreth 10 milionë euro) për të kontrolluar dhe rinovuar strehimoret e saj të mbrojtjes civile.

Suedia dhe vende të tjera evropiane kanë njoftuar planet për të rritur shpenzimet e mbrojtjes pas pushtimit rus të Ukrainës dhe, së fundmi, mbi dyshimet rreth angazhimit të presidentit amerikan Donald Trump ndaj NATO-s, shkruajnë mediat e huaja.

Sipas tyre, vendi nordik ka 64,000 bunkerë të mbrojtjes – më shumë se pothuajse çdo komb tjetër në botë – me hapësirë në përgjithësi për rreth shtatë milionë njerëz.

Që kur Suedia u bashkua me NATO-n në mars 2024, Agjencia e saj e Kontingjenteve Civile (MSB) ka rritur inspektimet e strehimoreve, disa prej të cilave janë mjaft të mëdha për të akomoduar mijëra njerëz në të njëjtën kohë.

Sipas MSB, strehimoret e mbrojtjes civile ofrojnë mbrojtje kundër valëve të goditjes dhe fragmenteve të bombës, shpërthimit dhe valëve të nxehtësisë nga një armë bërthamore, rrezatimit radioaktiv, gazit nga armët kimike dhe armët biologjike.

Qeveria po investon gjithashtu në përmirësimin e kapacitetit të shërbimeve të urgjencës për të vepruar gjatë konflikteve, duke forcuar sigurinë kibernetike dhe duke rimbushur rezervat e ilaçeve.

MSB tha të hënën se kishte filluar një projekt të madh për modernizimin e strehimoreve bërthamore, një detyrë që pritej të merrte “dy deri në tre vjet”.

Deri më tani, puna ka filluar në 25 nga 80 strehimoret veçanërisht të mëdha.

Në vitin 2025, agjencia planifikon të zëvendësojë filtrat që ndihmojnë në mbrojtjen e njerëzve në strehimore nga armët kimike dhe radiologjike.

Kryeministri Ulf Kristersson tha në janar se Suedia “nuk ishte në luftë, por nuk ka as paqe”.

Javën e kaluar ai njoftoi planet për të rritur shpenzimet e mbrojtjes me 30 miliardë dollarë gjatë dekadës së ardhshme.

Stokholmi uli shpenzimet ushtarake pas përfundimit të Luftës së Ftohtë, por filloi t’i rrisë përsëri kur Rusia aneksoi në mënyrë të njëanshme Krimenë në vitin 2014.