Ish-futbollisti anglez paralajmëron për Anis Mehmetin: Topi është në fushën e tij

Anis Mehmeti, ndonëse mbetet larg listave të trajnerit Silvinjo, është një nga emrat më të lakuar në kategorinë e dytë angleze. Loja dhe golat e tij kanë ndihmuar Bristolin të jetë në garë për një vend në zonën play-off, ku pakkush e mendonte se do të ishte në këtë pikë të sezonit.

Por me mbylljen e këtij edicioni, sido që të jetë, për anësorin e sulmit shqiptar dhe për klubin do të vijë një moment vendimtar, Mehmeti do të nisë vitin e fundit të kontratës së tij me Bristolin dhe i duhet të marrë vendimin nëse do të rinovojë, apo nëse do të largohet nga kjo skuadër, e cila kërkon të luajë shanset për ngjitjen për herë të parë në histori në Premier Ligë.

Ish-futbollisti anglez, Devid Pruton, i cili është aktualisht një opinionist sportiv, ka theksuar se çdo gjë është në varësi të Mehmetit, pasi me formën që po kalon dhe interesimin që ka për të, është e sigurt se do të ketë të ardhme në futbollin e rëndësishëm, sido që të vendosë.

“Anis Mehmeti bëri lëvizjen te Bristoli që ishte fantastike dhe tashmë po tregon frytet me 12 gola të shënuar në Championship në këtë sezon. Ai është 24-vjeçar dhe mund të shkojë drejt fundit të kontratës. Mendoj se po zhvillohet mirë nën drejtimin e Maning, mund të shihet se po argëtohet me futbollin që po luan. Bristoli ka një mundësi të shkojë në gjashtëshen e parë dhe kjo situatë mund të ndikojë.

Por të krijohet ndjesia se duke parë aftësitë dhe qasjen e Mehmetit, topi është qartësisht në fushën e tij dhe kjo i jep më shumë fuqi vendimi;”, shpjegoi ish-futbollisti anglez situatën e anësorit të sulmit.