Laporta me kritika ndaj La Ligës: Ata nuk mund të na mundin në fushë

Tema e regjistrimit të lojtarëve si Dani Olmo dhe Pau Victor është bërë mollë sherri mes La Ligës dhe Barcelonës.

Pasi që ishte miratuar regjistrimi i tyre, La Liga kishte dalur me një komunikatë duke thënë se marrëveshja nuk është përfshirë në llogaritë e fundit të audituara të klubit që do të thotë se Barça edhe një herë nuk ka vend për t’i regjistruar të dy.

Kjo e bëri që të reagonte presidentin e Barcelonës, Joan Laporta i cili ka thirrur një konferencë për media.

“Ne po luajmë një ndeshje kyçe sonte dhe La Liga po komunikon këtë mëngjes. E çuditshme. Ata nuk mund të na mundin në fushë, ndaj veprojnë jashtë saj”, u shpreh Laporta.

“Ne do t’i përgjigjemi La Ligës. Ata duan të sulmojnë interesat tona. La Liga miratoi nënshkrimet e Pau Victor dhe Olmo dhe tani ata kanë ndryshuar mendje. Pse?. A bënë ata një punë të keqe në radhë të parë kur miratuan operacionet”, shtoi Laporta.

Barcelona, sonte do të përballet në ndeshjen e kthimit të gjysmëfinales së Kupës së Mbretit kundër Atletico Madridit, në “CIVITAS Metropolitano”, në orën 21:30.